ކައުންސިލްތަކުގެ ރައީސުންނާއި ނައިބު ރައީސުލް ފިޔަވައި ދެންތިއްބަވާ މެމްބަރުންނަކީ، ޕާޓްޓައިމް ބަޔަކަށް ހެއްދެވުމުގެ ޚިޔާލެއް ރައިސުލްޖުމްހޫރިއްޔާ ހުށައަޅުއްވައިފިއެވެ. އެމަނިކުފާނު މިމޭރުމުން ވާހަކަފުޅު ދައްކަވާފައި ވަނީ، އެމަނިކުފާނު މިހާރު ހުވަދުއަތޮޅަށް ކުރައްވަމުން ގެންދަވާ ރަސްމީ ދަތުރުފުޅުގައި ރޭ، ގދ. ފިޔޯރީ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުުލްޖުމްހޫރިއްޔާ ވިދާޅުވީ، ޑިމޮކްރެސީގެ ހަމަތަކާ އުސޫލުތަކަށް އަސަރު ނުކުރާނެ ގޮތަށް، ކައުންސިލްތައް އެކުލެވިގެންވާ ގޮތާއި އިންތިޚާބުކުރާނެ ގޮތް ކަނޑައެޅުމުގައި އާންމު ބަހުސަކަށް، ނުވަތަ އާންމުންގެ މެދުގައި މަޝްވަރާކޮށް ޚިޔާލު ހުށަހެޅުމަށް ހުޅުވާލައްވާނެ ކަމަށެވެ. ރައީސް ވިދާޅުވީ، ކުރިންވެސް އެމަނިކުފާނު ކައުންސިލްތަކުގެ ޢަދަދު މަދުކުރުމުގެ ޚިޔާލު ފާޅުކުރައްވާފައިވާނެ ކަމަށާއި އަދި އެބަދަލު ގެންނަވާނީ، އެކަމަށްޓަކައި މަޝްވަރާކުރެވި ރައްޔިތުންގެ ޚިޔާލާއި ކަމާބެހޭ އެންމެންގެ މަޝްވަރާއާއިއެކުގައި ކަމަށެވެ. އަދި ކައުންސިލްތަކަށް ބަދަލު ގެނައުމުގައި އޮތް އެއް ކަންބޮޑުވުމަކަށްވީ ކައުންސިލަރުންގެ ޢަދަދު މަދުކޮށްފިނަމަ ޑިމޮކްރެޓިކް ރިޕްރެޒެންޓޭޝަނަށް އަސަރު ކޮށްފާނޭކަމުގެ ކަންބޮޑުވުންކަން އެމަނިކުފާނު ފާހަގަކުރެއްވިއެވެ.

އެހެންކަމުން ކައުންސިލަރުންގެ ޢަދަދު މަދުނުކޮށް، ފުލްޓައިމްކޮށް ކައުންސިލްގެ ރައީސާއި ނައިބު ރައީސް ތިއްބަވާ ގޮތަށް ކަނޑައެޅުމަކީ ޚަރަދު ކުޑަކުރުމަށް ކުރެވިދާނޭ ކަމެއް ކަމަށް ރައީސުލްޖުމްހުރިއްޔާ ވިދާޅުވިއެވެ. އަދި ކައުންސިލް އިންތިޚާބުގައި ފުލްޓައިމް މަޤާމުތަކުގެ ގޮތުގައި އިންތިޚާބުކުރާނީ ކައުންސިލްގެ ރައީސްގެ މަޤާމަށާއި ކައުންސިލްގެ ނައިބު ރައީސްގެ މަޤާމަށް އިންތިޚާބުކުރާ ދެމެންބަރުން ކަމަށް ކަނޑައަޅައި، އަދި މިހާރުވެސް ތިބޭ ޢަދަދަށް ކައުންސިލަރުން އިންތިޚާބުކުރި ނަމަވެސް އެއީ ކޮންމެ ޖަލްސާއަކަށް އެލަވެންސެއް ލިބޭގޮތަށް ތިބޭ މެބަރުން ކަމުގައި ހެދުމަށް އެމަނިކުފާނަށް ފެނިވަޑައިގަންނަވާކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ.

ކައުންސިލްތަކުގެ އިދާރާއި އޮނިގަނޑަށް ސަރުކާރުން ބަދަލު ގެނައުމަށް ބޭނުންވާ މައިގަނޑު އެއް ސަބަބަކީ މިހާރު އޮތް ގޮތުން ކައުންސިލަރުންގެ މުސާރައަށް ދައުލަތުން ބޮޑުި ހޭދައެއް ކުރަންޖެހިފައި އޮތުމެވެ. އެހެންނަމަވެސް އެބަދަލުތައް ގެނައުމަށް އިދިކޮޅު ފަރާތްތަކުން ވަނީ ދެކޮޅު ހަދާފައެވެ. އިދިކޮޅު ފަރާތްތަކުން ތުހުމަތު ކުރާ ގޮތުގައި ރައީސުލްޖުމްހޫރިއްޔާ މަސައްކަތްޕުޅު ކުރައްވަމުން ގެންދަވަނީ، ލާމަރުކަޒީ ނިޒާމާއި ކައުންސިލްތަކުގެ ނިޒާމްތައް ހަލާކުކޮށްލައި އެމަނިކުފާނަށް ދިގުމުއްދަތެއްގައި ވެރިކަމުގައި ހުންނެވޭނޭ މަގު ފަހިކުރެއްވުމަށެވެ.