ޗައިނާގެ ސީޒާންގ ޕްރޮވިންސަށް އައި ބާރުގަދަ ބިންހެލުމާއި ގުޅިގެން ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ޗައިނާގެ ރައީސަށް ހަމްދަރުދީގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ޗައިނާގެ ރައީސް ޝީ ޖިންގޕިންއަށް ފޮނުއްވި މެސެޖުގައި މިއަދުގެ ބިންހެލުމުގައި މަރުވި މީހުންގެ އާއިލާތަކަށް ވަރަށް އިޚްލާޞްތެރިކަމާއެކު ތަޢުޒިޔާ ފޮނުއްވާފައިވެއެވެ. 

ރައީސުލްޖުމްހޫރިއްޔާ ފޮނުއްވި މެސެޖު ނިންމަވާލައްވާފައިވަނީ މި ހާދިސާގެ ސަބަބުން ދިމާވި ގެއްލުންތަކުން އަރައިގަތުމަށް ކުރެވެމުންދާ މަސައްކަތްތަކުން ކާމިޔާބު ލިބުމަށް އެދިވަޑައިގެން، އެކަމުން އަރައިގަތުމުގެ ހިއްވަރާއި ސާބިތުކަމަށް އެދިވަޑައިގަންނަވަމުން ކަމުގައި ރައީސުލްޖުމްހޫރިއްޔާގެ އޮފީހުން ވަނީ ހާމަކުރައްވާފައެވެ.

ޗައިނާގެ ސީޒާންގ ޕްރޮވިންސަށް މިއަދުއައި ބާރުގަދަ ބިންހެލުން ރެކޯޑްކުރެވިފައިވަނީ، ރިކްޓަރ ސްކޭލްއިން، 7.1ގެ ބާރު މިނުގައެވެ. މިބިންހެލުމުގެ ލޮޅުންތައް ބަނގުލަދޭޝް އާއި ނޭޕާލާއި އިންޑިއާ އަދި ބޫޓާނަށްވެސް ފޯރާފައިވެއެވެ. މިބިންހެލުމުގައި މަރުވި މީހުންގެ އަދަދު މިހާރު ވަނީ 95އަށް އަރާފައެވެ.