މަސައްކަތް ކުރައްވަމުން ގެންދަވަނީ ވަށައިޖެހޭ ތަރައްޤީއެއް ގެނައުމަށް ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ޤައުމީ އެއާލައިން މޯލްޑިވިއަންގެ ވައިޑް-ބޮޑީ އެއާކްރާފްޓް އޮޕަރޭޝަން އަދި އެއާބަސް އޭ330-200، އިފްތިތާޙުކުރުމަށް ބޭއްވި ހަފުލާގައި ރައްޔިތުންނާ މުޚާޠަބުކުރައްވައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި މިއަހަރަކީ، ހުރިހާ ރޮނގަކުން ދިވެހިރާއްޖެއަށް މުހިއްމު ގިނަ ތަރައްޤީތަކެއް ގެނެވޭނެ އަހަރެއް ކަމުގައި ވިދާޅުވިއެވެ. ރައީސުލްޖުމްހޫރިއްޔާ ވިދާޅުވީ، ކުރިއަށް މިއޮތީ ތަރައްޤީގެ މަސައްކަތުގެ ދުވަސްތައް ކަމަށާއި، މި އަހަރަކީ،  ތަރައްޤީގެ އަހަރު  ކަމަށެވެ. 

މީގެ ކުރިންވެސް ރައީސުލްޖުމްހޫރިއްޔާ ވަނީ  މިއަހަރަކީ ތަރައްޤީގެ އަހަރު ކަމުގައި ހައްދަވާނެ ކަމުގައި ވިދާޅުވެފައެވެ. މިގޮތުން ޚާއްޞަ ގޮތެއްގައި މިއަހަރު ބޯހިޔާވަހިކަމުގެ މަޝްރޫޢުތަކަށް އިސްކަން ދެއްވާނެ ކަމުގައި އެމަނިކުފާނު ވަނީ ވިދާޅުވެފައެވެ.