ބުރާސްފަތި ދުވަހުގެ އަލިފާނުގެ ހާދިސާގައި އަނދައިގެން ދިޔަ އޮފީސްތަކުގެ މަސައްކަތްތައް ދަރުބާރުގޭގައި މިއަދު ފަށައިފިއެވެ.

ދަރުބާރުގޭގައި އޮފީސްތައް ޤާއިމްކޮށް ޚިދުމަތް ދޭންފަށާފައި ވަނީ، ހައުސިންގ މިނިސްޓްރީ އާއި ކޮންސްޓްރަކްޝަން މިނިސްޓްރީ އާއި އެންވަޔަރަމަންޓް މިނިސްޓްރީގެ އިތުރުން އެެންވަޔަރަމަންޓް މިނިސްޓްރީއެވެ. ބުރާސްފަތި ދުވަހުގެ އަލިފާނުގެ ހާދިސާގައި އަނދައިގެން ގޮސްފައި ވަނީ އެ ހަތަރު އޮފީސް ހިންގަމުން ގެންދިޔަ އިމާރާތްތަކެވެ. އޭގެ އިތުރުން، ހައުސިންގ މިނިސްޓްރީގެ އިމާރާތާއި ކައިރީގައި ހުރި މާލޭ ސިޓީ ކައުންސިލްގެ އާބާދިއާ ބެހޭބަޔަށް ވެސް ގެއްލުންތައް ލިބި، އެއޮފީހުގެ މަސައްކަތްތަކަށްވެސް ވަނީ ބުރޫ އަރާފައެވެ. މާލޭ ސިޓީ ކައުންސިލުން ވަނީ އެެއޮފީސް ހިންގުމުގެ އިންތިޒާމްތައް ހަމަޖެއްސުމުގެ މަސައްކަތް ފަށާފައެވެ.

ބުރާސްފަތި ދުވަހުގެ އަލިފާނުގެ ހާދިސާ ހިނގީ ކަރަންޓް ޝޯޓެއްގެ ސަބަބުން ކަމަށް ވާހަކަ ދެކެވިފައިވާއިރު، އަލިފާނުގެ ހާދިސާގެ ސަބަބު ދެނެގަތުމަށް ބޭރުގެ ކަމާއިބެހޭ ތަޖުރިބާކާރުންގެ ތަޙްޤީޤު ޓީމެއް ރާއްޖެ ގެނައުމަށް ސަރުކާރުން ވަނީ ނިންމަވާފައެވެ.