ވިލުފުށީ ހެޔޮބަސް ޖަމިއްޔާއިން މިއަހަރުދޭ އުމްރާ ދަތުރު ލިބޭފަރާތް ހޮވައިފިއެވެ.

މިއުމްރާ ދަތުރަށް ގުރުއަތުން ހޮވިފައި ވަނީ، ތ ވިލުފުށީ ބީޗްހެވަން، އަޙްމަދު ޖަލްވާން ޖިނާޙް އެވެ. މިއުމްރާ ދަތުރަކީ، ހެޔޮބަސް ޖަމިއްޔާއިން ބާއްވާ ދަރުސްތަކުގެ ތެރެއިން މަދުވެގެން 3 ދަރުސްގައި ބައިވެރިވާ ފަރާތްތަކުގެ މެދުގައި ގުރުއަތު ނަގައިގެން ހޮވޭ ފަރާތަަކަށް ދޭ ޢުމްރާ ދަތުރެކެވެ. މީގެ އިތުރުން ކޮންމެ ދަރުހެއްގައިވެސް ބައިވެރިވާ ފަރާތްތަކުގެ ތެރެއިން ގުރުއަތުން ހޮވޭ 10 ފަރާތަކަށް ގިފްޓް ވައުޗަރ ދޭއިރު ރޭގެ ދަރުހުގައި ބައިވެރިިވި ފަރާތްތަކުގެ ތެރެއިންވެސް 10 ފަރާަކަށް ވަނީ ގިފްޓް ވައުޗަރު ދީފައެވެ.

ވިލުފުށީ ހެޔޮބަސް ޖަމިއްޔާއިން މައުލޫމާތު ދީފައިވާ ގޮތުގައި މިއަހަރުގެ އުމްރާ ދަތުރު ދީފައި ވަނީ، ދަރުމަ ހައްޖު އެންޑް އުމްރާ ޤުރޫޕުގެ ހެޔޮއެދުންތަކާއި އެކުގައެވެ.

ރޭ ވިލުފުށީ ސްކޫލު ކުރިމަތިން އޮންނަ ހުސްބިމުގައި ބޭއްވި ދަރުހުގައި ދީނީ ނަސޭޙަތް ދެއްވާފައިވަނީ މަރުވުމަށްފަހު މިމައުޟޫއަށް އައްޝައިޚް މުޙައްމަދު މޫސާއެެވެ. އިއްޔެ ވިލުފުށީ ހުކުރުމިސްކިތުގައި އިމާމުވެ ހުކުރުކުރެއްވުމުގެ އިތުރުން، ވިލުފުށީ ސްކޫލުގެ ދަރިވަރުންނަށް ހިންގި ދީނީ ނަސޭހަތް ދިނުމުގެ ޕްރޮގްރާމާއި، ފަރުޟު ނަމާދު ތަކަށް ފަހުގައި ދީނީ ނަސޭހަތް ދިނުމުގެ ޕްރޮގްރާމްގައިވެސް، ނަސޭހަތް ދެއްވާފައި ވަނީ ޝައިޚް މުޙައްމަދު މޫސާއެވެ.

ވިލުފުށި ހެޔޮބަސް ޖަމިއްޔާއަކީ، ދީނީ ހޭލުންތެރިކަން އިތުރުކުރުމަށް 2005 ވަނަ އަހަރުންފެށިގެން ހެޔޮބަސް ގުރޫޕުގެ ގޮތުގައި މަސައްކަތް ކުރަމުން އައިސް 2022 ވަނަ އަހަރު ޖަމިއްޔާއެއްގެ ގޮތުގައި ރަޖިސްޓްރީކޮށް މިހާރު ހިންގަމުން އަންނަ ޖަމިއްޔާއެކެވެ.