ކުރިޔަށް މިއޮތް އަހަރު މާފަންނު މަދަރުސާގައި އައު ހޯލެއް ހައްދަވައި ދެއްވާނެ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މާފަންނު މަދަރުސާއަށް 40 އަހަރު ފުރުމުގެ މުނާސަބަތުގައި މިއަދު ހަވީރު އޮތް ޚާއްޞަ ރަސްމިއްޔާތު ޝަރަފުވެރިކޮށްދެއްވައި، ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާގެ ވާހަކަފުޅުގައި، މާފަންނު މަދަރުސާއަކީ، ކޮމިއުނިޓީ ސްކޫލެއްކަން ފާހަގަކުރައްވައި، ސްކޫލުގެ ކަންކަން ކުރިޔަށް ގެންދިޔުމުގައި، ސިޓީ ކައުންސިލާއި، ސަރުކާރާއި ގުޅިގެން މަސައްކަތްތައް ކުރަން ޖެހޭކަން ފާހަގަކުރެއްވިއެވެ. ރައީސުލްޖުމްހޫރިއްޔާ ވިދާޅުވީ، ކޮމިއުނިޓީ ސްކޫލްތަކަކީ ވަރަށް މުހިންމު ތަންތަންކަމަށާއި، ކޮމިއުނިޓީ ކޮންސެޕްޓްގައި ސްކޫލްތައް ހިންގުމަށްޓަކައި ލާމަރުކަޒީ ނިޒާމުގެ ތެރެއިން ކައުންސިލާ ހަވާލުކުރެވިފައިވާ ކަމަށެވެ.

މާފަންނު މަދަރުސާގެ ހޯލު ހުންނަނީ އެ ސްކޫލުގެ ފަސްބުރި އިމާރާތުގެ އެންމެ މަތީގައެވެ. ހޯލު އެންމެ މަތީގައި ހުންނާތީ، އެސްކޫލުގެ ދަރިވަރުންގެ ތެރެއިން ޙާއްޞައެހީއަށް ބޭނުންވާ ދަރިވަރުންނަށްވެސް ގިނަ ދަތިތަކާއި ކުރިމަތިވެފައިވެއެވެ.

މިހާރުގެ މާފަންނު މަދަރުސާ ހުޅުވުނީ 1984 ވަނަ އަހަރުގެ ފެބުރުއަރީ މަހުގެ 15 ވަނަ ދުވަހުއެވެ. މަދަރުސާ އުފެދުނު އިރު ނަރސަރީއިން ފެށިގެން ގުރޭޑް 6 އަށް ކިޔަވައިދެއްވިއެވެ. އޭގެ ފަހުން ގުރޭޑް 10ގެ ނިޔަލަށްވެސް މާފަންނު މަދަރުސާގައި ކިޔަވައިދެއްވިއެވެ. ނަމަވެސް 2016 ވަނަ އަހަރުން ފަށައިގެން މާފަންނު މަދަރުސާ ޚާއްޞަ ކުރައްވާފައި ވަނީ، ނަރސަރީއާއި ޕްރީ ސްކޫލު ޢުމުރުފުރާގެ ދަރިވަރުންނަށެވެ.