މުސާރަ ނުދީގެން ކަމަށް ބުނެ ރައީސުލްޖުމްހޫރިއްޔާގެ އޮފީހާއި ކައިރީގައި ގްރީން ޒޯނުގައި މުޒާހަރާކުރި ބިދޭސީން އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

ފުލުހުންގެ އިދާރާއިން ވިދާޅުވީ އެމުޒާހަރާގައި 52 ބިދޭސީން ބައިވެރިވެފައިވާ ކަމަށާއި އެ އެންމެން އިމިގްރޭޝަނާއި ހަވާލުކޮށްަފައިވާ ކަމަށެވެ. 

މިކަމާއި ގުޅޭ ގޮތުން އިމިގްރޭޝަންގެ ކޮންޓްރޯލަރ މުޙައްމަދު ޝަމްޢާން ވަހީދު އެކްސްގައި ކުރެއްވި ޕޯސްޓުގައި ވިދާޅުވީ، މިއަދު މާލޭގެ ގްރީން ޒޯނުގައި މުޒާހަރާކުރި 55 ބިދޭސީން ފުލުހުން ވަނީ އިމިގްރޭޝަނާއި ހަވާލުކޮށްފައި ކަމަށާއި، މި މައްސަލައާ ގުޅިގެން ބަލަންޖެހޭ ކަންކަން މިވަގުތު ދަނީ ބަލަމުންކަމަށެވެ. އަދި މި ބިދޭސީންނާ މެދު އަޅަންޖެހޭ ފިޔަވަޅެއް އަޅާނީ މައްސަލަ އެއްކޮށް ތަހުގީގުކޮށް ނިމުމުން ކަމުގައިވެސް ޝަމްޢާން ވިދާޅުވިއެވެ.

ޝަމްޢާން އިތުރަށް ވިދާޅުވީ، އެ ބިދޭސީންގެ ހައްގުތަކެއް ގެއްލިފައިވާކަމަށް އެފަރާތްތަކުން ބުނަމުންދާތީ، މިވަގުތު ލޭބަރ ރިލޭޝަންސް އޮތޯރިޓީއާއި ގުޅިގެން އެކަންތައްވެސް ބަލަމުން ގެންދާ ކަމަށެވެ. އަދި އިމިގްރޭޝަނުން ދޫކޮށްފައިވާ ހުއްދައިގެ ދަށުން ރާއްޖޭގައި އުޅޭ އެއްވެސް ފަރާތަކަށް ދިވެހިރާއްޖޭގައި ހެދިފައިވާ ޤާނޫނާއި ޤަވާއިދުތަކާއި ޚިލާފުވާކަށް ފުރުސަތެއް ދޭނެ ކަމަށާއި އަދި އެފަދަ ފަރާތްތާއިމެދު އިމިގްރޭޝަން ޤާނޫނުގެ ދަށުން ޢަމަލު ކުރަމުން ގެންދާނެ ކަމުގައިވެސް ޝަމްޢާން ވިދާޅުވިއެވެ.

ރާއްޖޭގެ އިޤުތިޞާދީ ޙާލަތު އިތުރަށް ގޯސްވަމުން އަންނަ އިރު، ބިދޭސީންނަށްވެސް މުސާރަ ނުދިނުމުގެ މައްސަލަތައް އަންނަނީ ފެންމަތި ވަމުންނެވެ.