ރާއްޖޭގެ  މަސްވެރިކަމުގެ ސިނާޢަތުގައި ހަރަކާތްތެރިވާ ކެޔޮޅުން އުފައްދާފައިވާ ކެޔޮޅުންގެ ލޮބީ ގުރޫޕުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އާއ ބައްދަލުކުރައްވައިފިއެވެ.

މިބައްދަލުކުރެއްވުން އޮތީ އިއްޔެ ހެނދުނު ރައީސުލްޖުމްހޫރިއްޔާގެ އޮފީހުގައެވެ. މިބައްދަލު ކުރެއްވުމުގައި ކެޔޮޅުންވަނީ މަސްވެރިންގެ ހުރި ކަންބޮޑުވުންތަކާއި ޝަކުވާތައް ރައީސުލްޖުމްހޫރިއްޔާ އާއި ޙިއްޞާކުރައްވާފައެވެ. މިގޮތުން މިފްކޯއިން ކިރުވާ މަހަށް ފައިސާ ނުލިބުމާއި، މަސްވެރިންނަށް އައިސް އަދުި ތެޔޮ ލިބުމުގައި ހުރި ދަތިތަކާއި، މަސް ކިރުވުމުގައި ހުރި ގޮންޖެހުންތަކުގެ ވާހަކަ ކެޔޮޅުން ވަނީ ރައީސަށް ދަންނަވާފައެވެ. މީގެ އިތުރުން ފިޝަރީޒް މިނިސްޓަރާއި ގުޅޭ ގޮތުން ހުރި ޝަކުވާތައްވެސް ކެޔޮޅުން ވަނީ ރައީސާ ޙިއްޞާކުރައްވާފައެވެ.

ބައްދަލުވުމުގައި ބައިވެރިވި ކެޔޮޅުން "ނޫން"އަށް މައުލޫމާތު ދެމުން ބުނީ، ރައީސާއިއެކު ބޭއްވި ބައްދަލުވުމުން އެނގިގެން ދިޔައީ ބައެއް ކަންކަން ހިނގަމުންދާ ގޮތް ޚުދު ރައީސަށްވެސް އެނގިވަޑައިނުގަންނަވާ ކަން ކަމަށެވެ. އަދި ކެޔޮޅުންގެ ބައެއް ވާހަކަތައް އަޑުއައްސަވާ ރައީސުލްޖުމްހޫރިއްޔާ ހައިރާންކަން ފާޅުކުރެއްވި ކަމަށާއި އެހެން ނަމަވެސް މިހާރު ހުރި މައްސަލަތައް ހައްލުކޮށްދެއްވާނެ ކަމަށް ރައީސް ވިދާޅުވިކަމުގައިވެސް ކެޔޮޅުން ބުންޏެވެ. އޭގެ އިތުރުން ކޮންމެ 3 މަހަކުން އެއްފަހަރު ކެޔޮޅުންނާއި ބައްދަލު ކުރައްވާނެ ކަމުގައި ރައީސް ވިދާޅުވި ކަމަށްވެސް ކެޔޮޅުން ބުންޏެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، މި ބައްދަލުކުރެއްވުމުގައި ކެޔޮޅުން ފާހަގަކުރެއްވި ކަންކަން، ވަރަށް ސީރިއަސް ގޮތެއްގައި ބައްލަވައި، އެކަންކަމަށް އަވަސް ފިޔަވަޅުތަކެއް އެޅުއްވުމަށް މަސައްކަތްޕުޅު ކުރައްވާނެކަމުގައި ރައީސުލްޖުމްހޫރިއްޔާ ވިދާޅުވި ކަމަށެވެ.