ރައީސުލް ޖުމްހޫރިއްޔާގެ އިޤުތިޞާދީ އިސްލާހީ އެޖެންޑާގެ ދަށުން ވަޒީފާއިން ވަކިކުރުމަށް ނިންމި 228 މީހުންނަކީ ކޮބައިކަން ރައީސުލްޖުމްހޫރިއްޔާގެ އޮފީހުން ސިއްރުކޮށްފިއެވެ.

228 ސިޔާސީ މުވައްޒަފުން ވަކިކުރަން ނިންމާފައިވާކަން ރައީސް ޑރ. މުހައްމަދު މުއިއްޒު އިއުލާން ކުރެއްވީ މިދިޔަ އޮކްޓޯބަރު މަހުގެ 15 ގަ އެވެ. އޭގެ ތެރޭގައި ހިމެނެނީ، 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑައިރެކްޓަރުންނާއި، 69 ޕޮލިޓިކަލް ޑައިރެކްޓަރުން ކަމަށާއި، އެއާއެކު ދައުލަތުގެ ބަޖެޓުން މުސާރައަށް ކުރާ ހޭދައިން، މަހަކު 5.714 މިލިއަން ރުފިޔާ ސަލާމަތް ކުރެވޭނެ ކަމުގައި ރައީސުލްޖުމްހޫރިއްޔާ އެދުވަހު އެކްސްގައި ކުރެއްވި ޕޯސްޓްގައި ވިދާޅުވެފައިވެެއެވެ.

އޭގެ ފަހުން ނޮވެމްބަރު މަހު، ރައީސް އޮފީހުގެ ތަރުޖަމާނު ހީނާ ވަލީދު ވަނީ އެކްސްގައި ކުރެއްވި ޕޯސްޓެއްގައި ވިދާޅުވީ ރައީސުލްޖުމްހޫރިއްޔާ ވިދާޅުވެފައިވާ ފަދައިން 228 ސިޔާސީ މަޤާމު މަދުކޮށްފައިވާ ކަމަށެވެ. އެހެން ނަމަވެސް އެމަޤާމުތަކާއި ގުޅޭ ތަފްސީލްތަކެއް ސަރުކާރުން ހާމައެއް ނުކުރެއެވެ.

ސިޔާސީ މަޤާމުތަކުން މީހުން ވަކިކުރިކަން ކަށަވަރު ކުރުމަށް އެކަމާއު ގުޅޭ ތަފްސީލް މައުލޫމާތު ހޯދުމަަށް، މައުލޫމާތު ހޯދައި ލިބިގަތުމުގެ ގާނޫނުގެ ދަށުން، އަމިއްލަ ފަރާތަކުން ހުށައެޅި އާރް.ޓީ.އައި ފޯމަށް ރައީސް އޮފީހުން ދިން ޖަވާބުގައި ބުނެފައި ވަނީ، ވަޒީފާއިން ވަކިކުރި ފަރާތްތަކުގެ ޒާތީ މައުލޫމާތަކަށް އެމައުލޫމާތު ވާތީ އެކަން ހާމަކުރެވެން ނެތް ކަމަށެވެ.

ބައެއް އާއްމުންނާއި ސިޔާސީ ފަރާތްތަކުންވެސް ތުހުމަތުކުރާ ގޮތުގައި 228 ސިޔާސީ ވަޒީފާ މަދުކުރިކަމަށް ސަރުކާރުން ދައްކާވާހަކައަކީވެސް އޮޅުވާލުމެކެވެ.