ސިވިލްކޯޓުގެ ޙުކުމާއި އެއްގޮތަށް، ދައްކަންޖެހޭ ޖޫރިމަނާ ފައިސާ، ރައީސުލްޖުމްހޫރިއްޔާ ޢަބުދުﷲ ޔާމީން ޢަބުދުލް ޤައްޔޫމް ދައުލަތަށް ދައްކާފައި ނުވާތީ އެފައިސާ ހޯދުމަށް ބަންޑާރަ ނައިބުގެ އޮފީހުން ސިވިލްކޯޓަށް މައްސަލަ ވައްދައިފިއެވެ.

ބަންޑާރަ ނައިބުގެ އޮފީހުން ވިދާޅުވީ، ކްރިމިނަލް ކޯޓުގެ ނަންބަރު 698/ސީއާރްސީ/2021 ޤަޟިއްޔާއިން މއ.ކާމިނީހުޅަނގުގެ، ޢަބްދުﷲ ޔާމީން ޢަބްދުލްޤައްޔޫމްގެ މައްޗަށް ކުރެވުނު ޙުކުމުގެ ދަށުން ދައްކަންޖެހޭ 5،000،000 (ފަސްމިލިއަން) ޔޫއެސް ޑޮލަރު ޙުކުމުގައި ބުނާ މުއްދަތުގައި ޢަބްދުﷲ ޔާމީން ޢަބްދުލްޤައްޔޫމް ދައްކާފައި ނުވާކަމަށެވެ. އަދި މޯލްޑިވްސް އިންލޭންޑް ރެވެނިއު އޮތޯރިޓީއިން އެ ފައިސާ ދެއްކުމަށް އަންގައި ޓެކްސް ނެގުމާބެހޭ އިދާރީ ޤާނޫނުގެ ދަށުން ފޮނުވި ނޯޓިސްއާއެއްގޮތަށްވެސް ޢަބްދުﷲ ޔާމީން ޢަބްދުލްޤައްޔޫމް އެ ފައިސާ ދައްކާފައިނުވާކަމުގައިވެސް ބަންޑާރަ ނައިބުގެ އޮފީހުން ވިދާޅުވެފައި ވެއެވެ.

ބަންޑާރަ ނައިބުގެ އޮފީހުން ވިދާޅުވީ، އެފައިސާ ރައީސް ޔާމީނު ދައްކަވާފައި ނުވާތީއާ އަދި ދައްކަވަންޖެހޭ މުއްދަތު ފަހަނަ އަޅައި ގޮސްފައިވާތީ، ޓެކްސް ނެގުމާބެހޭ އިދާރީ ޤާނޫނަށް 3 ވަނަ އިޞްލާޙު ގެނައުމުގެ ޤާނޫނުގެ 50 ވަނަ މާއްދާގެ (ބ) ގެ ދަށުން، ކްރިމިނަލް ކޯޓުގެ ޙުކުމުގައި ދައްކަން އަންގާފައިވާ ފައިސާ ހޯދުމަށް، ޙުކުމް ތަންފީޒުކުރުމުގެ މައްސަލަ ބަންޑާރަ ނައިބުގެ ފަރާތުން ސިވިލް ކޯޓަށް ހުށައަޅުއްވާފައިވާ ކަމަށެވެ.

ރައީސް ޔާމީނުގެ ކެންޑިޑެންސީ ބަލައި ނުގަތުމަށް އިލެކްޝަންސް ކޮމިޝަނުން ނިންމުމާއި ގުޅިގެން ރައީސް ޔާމީނުގެ ފަރާތްޕުޅުން ދިވެހިރާއްޖޭގެ ސްޕްރީމްކޯޓަށް ހުށައެޅި މައްސަލައިގައި، އެކޯޓުން ނިންމާފައި ވަނީ، އިލެކްޝަންސް ކޮމިޝަނުން ރައީސް ޔާމީނުގެ ޝަރުޠު ފުރިހަމަ ނުވާކަަމަށް ކަނޑައެޅީ ރަނގަޅަށް ކަމަށެވެ. އަދި ރައީސް ޔާމީނު ދައުލަތަށް ދެއްކުމަށް ކްރިމިނަލް ކޯޓުން ޙުކުމްކޮށްފައިވާ 5 މިލިއަން ޑޮލަރަކީ، ސާބިތު ދަރަނި ކަމުގައިވެސް ކޯޓުން ކަނޑައަޅާފައިވެއެވެ. އެ ފައިސާ އާއި ގުޅޭ ގޮތުން ރައީސް ޔާމީނު ވިދާޅުވީ، ފައިސާ ނުދައްކަވާ އޮތީ ފައިސާ ނުދައްކާންވެގެން ނޫން ކަމަށާއި، ފައިސާ ދައްކަންޖެހޭ އެންމެ ފަހު މުއްދަތަކީ ކޮބައިކަން އެނގިވަޑައި ނުގަންނަވާތީ ކަމުގައެވެ.

ރައީސް ޔާމީނު ފަސްމިލިއަށް ޑޮލަރުން ޖޫރިމަނާކޮށް 6 މަސް ދުވަހުގެ ތެރޭގައި އެފައިސާ ދައުލަތަށް ދެއްކުމަށް އަންގައި ކްރިިނަލްކޯޓުން ޙުކުމް ކުރީ، 22 ޑިސެމްބަރު 2022ގައެވެ. އެހުކުމައި ބަޔާންކޮށްފައިވާ 6 މަސްދުވަހުގެ މުއްދަތު ހަަމަވީ، 22 ޖޫން 2023ގެ ނިޔަލަށެވެ.