ހުޅުމާލެ ފޭސް 2 ގައި ޤާއިމްކުރި ބުޅާފަދަ ޖަނަވާރު ބަލަހައްޓާ ފެސިލިޓީ، "އޮޅު ހިޔާ" ހިންގުން މާލެ ސިޓީ ކައުންސިލުން ވަކިކޮށް އެގްރިކަލްޗަރ މިނިސްޓްރީއާ ހަވާލު ކުރުމަށް ސަރުކާރުން ނިންމައިފިއެވެ.

މިކަން މާލޭ ސިޓީ ކައުންސިލުން ވަނީ ކަށަަވަރުކޮށްދެއްވާފައެވެ. މައުލޫމާތު ލިބިފައިވާ ގޮތުގައި "އޮޅުހިޔާ" ހިންގުން މާލޭ ސިޓި ކައުންސިލްގެ ދަށުން އަތުލައި އެތަން ހިންގުން އެގްރިކަލްޗަރ މިނިސްޓްރީއާ ހަވާލުކުރުމަށް ނިންމާފައި ވަނީ، ވަޒީރުންގެ މަޖިލީހުން އެގޮތަށް ނިންމައިގެން ކަމުގައި ސިޓީއަކުން މާލޭ ސިޓީކައުންސިލަށް ސަރުކާރުން އަންގަވާފައިވާ ކަމުގައި ސިޓީ ކައުންސިލުން ހާމަކުރައްވާފައިވެއެވެ.

މިއަދު ސަރުކާރުން އެނިންމުން ނިންމާފައި ވަނީ އޮޅުހިޔާއަށް ބުޅާތައް ގެންދިޔުމަށް ނިންމައި، ސިޓީކައުންސިލުން އެމަސައްކަތް ފަށާފައި ވަނިކޮށް އެގްރިކަލްޗަރ މިނިސްޓްރީ އެކަން މަޑުޖައްސާލުމަށް އިއުލާނުކޮށްފައި ވަނިކޮށެވެ.

"އޮޅު ހިޔާ" ތަރައްޤީކޮށްފައި ވަނީ މާލޭ ސިޓީ ކައުންސިލުގެ ބަޖެޓުން ޚަރަދުކޮށްގެންނެވެ. އަދި އެތަނަށް މުވައްޒަފުން ހޯދުމަށް ސިޓީ ކައުންސިލުން އޮތީ އިޢުލާނުވެސް ކޮށްފައެވެ. އަދި އޮޅުހިޔާ ހަދާފައިވާ ބިންވެސް އެޗްޑީސީން ކުއްޔަށް ދޫކޮށްފައި އޮތީ ސިޓީކައުންސިލަށެވެ.
މާލޭ ސިޓީ ކައުންސިލްގެ މޭޔަރު އާދަމް އާޒިމް ވިދާޅުވީ އޮޅުހިޔާ އެގްރިކަލްޗަރ މިނިސްޓްރީއާ ހަވާލުކުރުމާއި ގުޅޭ ގޮތުން ގޮތެއް ނިންމާނީ ކައުންސިލް ބައްދަލުވުމަށް ހުށައަޅުއްވައިގެން ކަމަށެވެ.

އޮޅުހިޔާ ރަސްމީގޮތުން ހުޅުއްވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުސްވި ނޮވެމްބަރު މަހުގެ 2 ވަނަ ދުވަހުގައެވެ.