ރާއްޖޭގައި ސިޔާސީ މެމްބަރުން އެންމެ ގިނަ ޕާޓީ ޕީޕީއެމް އުވައިލުމަށް އެޕާޓީގެ ސެނެޓުން މިއަދު ފާސްކޮށްފިއެވެ.

ޕީޕިއެމްއަކީ، 2013 2018އަށް ރާއްޖޭގައި ވެރިކަން ކުރި ޕާޓީއެވެ. އަދި މިހާރު ވެރިކަމުގައި އޮތް ޕާޓީ ޕީއެންސީއަކީ، ވެރިކަން ހޯދުމަށްޓަކައި އެޕާޓީގެ ތެެރެއިން އުފެއްދި ޕާޓީއެކެވެ. އަދި މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމަށް ވަޑައިގެންނެވުމަށްޓަަކައިވެސް ބޭނުންފުޅު ކުރެއްވީ އެޕާޓީގެ ކުލައާއި ލޯގޯއެވެ. އެހެން ނަމަވެސް މިހާރު ސިޔާސީ ޕާޓީތަކުގެ ޤާނޫނަށް ގެނެސްފައިވާ އިސްލާޙްގައި އުވާލާފައިވާ ޕާޓީއެއްގެ ކުލަ އާއި ލޯގޯ އާއި ދިދަ އަދި ނިޝާންތައް ބޭނުން ކުރުން ވަނީ މަނާކޮށްފައެވެ.

ޕީޕީއެމްގެ ނައިބު ރައީސް އަދި މިސަރުކާރުގެ ފިޝަރީޒް މިނިސްޓަރ އަޙްމަދު ޝިޔާމް މުޙައްމަދު ވިދާޅުވީ، ޕާޓީ އުވާލުމުގެ ޤަރާރު ސެނެޓަށް ހުށައަޅާފައި ވަނީ އެޕާޓީގެ އަސާސީ ޤަވާއިދުގެ 61 ވަނަ މާއްދާގެ ނ ގައިވާ ގޮތުގެ މަތިން ކަމަށެވެ. އަދި އެޤަރާރު ސެނެޓުން ފާސްކޮށްފައި ވަނީ، ސެނެޓަށް ހާޟިރުވެވަޑަިއގެން ތިއްބެވި 41 މެމްބަރުންގެ އިއްތިފާޤުން ކަމުގައިވެސް ޝިޔާމް ވިދާޅުވިއެވެ. އަދި އެނިންމުމާއި އެކު ޕާޓީ އުވިގެން ދިޔައީ ކަމުގައިވެސް ޝިޔާމް ވިދާޅުވިއެވެ.

ޕީޕިއެމްއަކީ، ރައީސް މައުމޫނު އިސްވެ ހުންނަވައި އުފެއްދެވި ޑީއާރްޕީގެ ތެރޭގައި ބައިބައިވުން އުފެދި އެމަނިކުފާނު އުފެއްދެވި ދެވަނަ ޕާޓީއެވެ. ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އުފެއްދުމުގެ ރައީސް މައުމޫނުގެ ދަރިކަލުން ފާރިޝް މައުމޫނަށް އިލެކްޝަންސް ކޮމިޝަނުން ދިނީ 09 ސެޕްޓެމްބަރު 2011 ގައެވެ. ރައީސް މައުމޫނާއި ޖެހުނު މައްސަލަތަކުގައި ރައީސް ޔާމީނުގެ ކޮންޓްރޯލްގެ ދަށަށް ޕާޓީ ގެނެސް އެޕާޓިން ރައީސް މައުމޫނު ވަކިކުރެއްވީ 2016 ވަނަ އަހަރުގައެވެ. އަދި ޕީއެންސީ އޭރު އުފެއްދެވީ އެމައްސަލައިގައި ރައީސް ޔާމީނު ކޯޓަށް ވަޑައިގެންނެވުމުންނެވެ.