މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ މަޤާމުގައި ހުންނެވި،  ޑޮކްޓަރ ޢާއިޝަތު ރަމީލާ މިއަދު އެމަޤާމުން އިސްތިއުފާ ދެއްވައިފިއެވެ.

ރައީސުލްޖުމްހޫރިއްޔާގެ އޮފީހުން ވިދާޅުވީ، މިނިސްޓަެ ރަމީލާ އެމަޤާމުން އިސްތިއުފާ ދެއްވާފައިވަނީ އެކަމަނާގެ ސިއްޙީޙާލުކޮޅު ހުރި ގޮތުން ކަމަށެވެ. އަދި އެކަމަނާގެ އިސްތިއުފާ ރައީސުލްޖުމްހޫރިއްޔާ ޤަބޫލުފުޅު ކުރައްވާފައިވާ ކަމުގައިވެސް ރައީސުލްޖުމްހޫރިއްޔާގެ އޮފީހުން ހާމަކުރައްވާފައި ވެއެވެ. އަދި ޑޮކްޓަރ ޢާއިޝަތު ރަމީލާ، އަލާސްކަންފުޅުގައި އުޅުއްވަމުންވެސް، މިނިސްޓަރ އޮފް އެގްރިކަލްޗަރ އެންޑް އެނިމަލް ވެލްފެއަރގެ ހައިސިއްޔަތުން، ދިވެހިރާއްޖޭގެ ޤާނޫނީ ވެރިކަން ކުރިއަރުވައި، އެންމެހައި ރައްޔިތުންނަށް ލާބައާއި ފާގަތިކަން ހޯދައިދެނިވިމަގުން، މި ދައުލަތުގެ ކަންތައްތައް ރަނގަޅަށް ހިންގުމުގައި އެހީތެރިވުމަށް، އަޅުގަނޑަށް ދެއްވި އެއްބާރުލެއްވުމަށާއި، ތެދުވެރިކަމާއި ވިސްނުންތެރިކަމާއެކު، ސަރުކާރަށް ކޮށްދެއްވި އަގުހުރި ޚިދުމަތްތަކަށްޓަކައި އެކަމަނާއަށް ޝުކުރުއަދާކުރައްވާ ކަމުގައިވެސް ރައީސުލްޖުމްހޫރިއްޔާ ވަނީ ވިދާޅުވެފައެވެ. 

އަދި ޑޮކްޓަރ ޢާއިޝަތު ރަމީލާ ފަދަ ހީވާގި އަމާނާތްތެރި ޤާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ލިބިވަޑައިގެންނެވި އުފާފުޅެއް ކަމަށާއި، ކުރިއަށް އޮތްތާނގައިވެސް އެ ކަމަނާގެ ޚިދުމަތް ދިވެހި ޤައުމަށް ލިބޭނެކަން ޔަޤީން ކުރައްވާ ކަމުގައި ވިދާޅުވެ، އެކަމަނާއަށް އަވަސް ޝިފާއަކަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ.

ޑރ އާއިޝަތު ރަމީލާ މަޤާމާއި ހަވާލުވެވަޑައިގެންނެވީ 17 ނޮވެމްބަރު 2023ގައެވެ. މަގާމާ ހަވާލުވެވަޑައިގެންނެވިތާ މާގިނަ ދުވަހެއް ނުވެ އާލާސްކަންފުޅާއި ގުޅިގެން ވަރަށް ގިނަ ދުވަހު އެކަމަނާ އިންޑިއާގައި މަޑުކުރައްވަން ޖެހިވަޑައިގަތެވެ.