މަގުމައްޗަށް ވެއްޓިފައި އޮއްވައި ފެނިގެން ހޮސްޕިޓަލަށް ގެންދިޔަކަމަށް ކުރިން ބުނި މީހާއަކީ، އާޓިފިޝަލް ބީޗު ކެފޭއެއްގައި އިންދައި މެއަށް ތަދެއް އަރައިގެން ހޮސްޕިޓަލަށް ގެންދެވުނު މީހެއް ކަމުގައި ފުލުހުންގެ އިދާރާއިން ވިދާޅުވެއްޖެއެވެ.

އެންމެ ފުރަތަމަ ފުލުހުން މީޑިއާތަކަށް މައުލޫމާތު ދީފައި ވަނީ އެމީހާ ފެނުނީ، އާޓިފިޝަލް ބީޗު ކައިރިން މަގުމައްޗަށް ވެއްޓިފައި އޮއްވައި ކަމަށެވެ. އެހެން ނަމަވެސް އެއީ މައުލޫމާތު ލިބުމުގައި އެރި އޮޅުމެއް ކަމަށް ފުލުހުން ވަނީ ވިދާޅުވެފައެވެ.

މިއަދުގެ ހާދިސާގައި ނިޔާވެފައި ވަނީ، ސ. ހިތަދޫ ސޯސަންގެ، އަޙްމަދު ޝަރީފް (53އ)އެވެ. ފުލުހުން ވިދާޅުވި ގޮތުގައި އޭޑީކޭ ހޮސްޕިޓަލުގައި ފަރުވާދެމުންދަނިކޮށް އޭނާ ނިޔާވީ، މިއަދުގެ ހެނދުނު 10:03 ހާއިރުގައެވެ.

ފުލުހުންގެ އިދާރާއިން ވިދާޅުވީ މަރުގެ އެ މައްސަލަ ތަޙްޤީޤު ކުރަމުންގެންދާ ކަމަށެވެ.