އިލެކްޝަންސް ކޮމިޝަނާއި، އެންޓިކަރަޕްޝަން ކޮމިޝަން އޭސީސީގެ ރައީސާއި ނައިބުރައީސް ޢައްޔަނުކުރުމުގެ ބާރު ރައީސުލްޖުމްހޫރިއްޔާއަށް ލިބޭ ގޮތަށް، ރައްޔިތުންގެ މަޖިލީހުން ފާސްކުރި، (އެންޓި-ކޮރަޕްޝަން ކޮމިޝަނުގެ ޤާނޫނު) އަށް 3 ވަނަ އިޞްލާޙު ގެނައުމުގެ ބިލާއި، (އިލެކްޝަންސް ކޮމިޝަންގެ ޤާނޫނު) އަށް ދެވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ތަސްދީޤު ކުރައްވައި މިހަފްތާގެ އަންގާރަ ދުވަހު ގެޒެޓު ކުރައްވައިފިއެވެ.

މި ބިލްތަކަކީ، 2024 ނޮވެންބަރު 25 ވީ ހޯމަ ދުވަހު ބޭއްވެވި 20 ވަނަ ރައްޔިތުންގެ މަޖިލީހުގެ 53 ވަނަ ޖަލްސާއިން ފާސްކުރެއްވި ބިލްތަކެކެވެ. މިދެ ޤާނޫނަށްވެސް ގެނެވުނު މައިގަނޑު އިސްލާޙަކީ، އެދެކޮމިޝަންގެ ރައީސާއި ނައިބު ރައީސް ރައީސުލްޖުމްހޫރިއްޔާ ޢައްޔަނުކުރައްވާ ގޮތަށް ހަމަޖެއްސުމެވެ. 

 މިއިޞްލާޙު ތަކުގައި ވާގޮތުން، ކޮމިޝަނުގެ ރައީސް ނުވަތަ ނާއިބު ރައީސް މަގާމުން އިސްތިޢުފާދޭން ބޭނުންވެއްޖެ ހާލަތުގައި، ސިޓީއަކުން އެކަން ބަޔާންކޮށް، ރައީސުލްޖުމްހޫރިއްޔާއަށް ހުށަހަޅައި، އެ ސިޓީ ރައީސުލްޖުމްހޫރިއްޔާއަށް ލިބުމުން، ކޮމިޝަނުގެ ރައީސްކަމުގެ މަގާމުން ނުވަތަ ނާއިބު ރައީސްކަމުގެ މަގާމުން އެ މީހަކު ވަކިވީކަމަށް ވެސް ބަޔާންކޮށްފައިވެއެވެ.

ޤާނޫނަށް ގެނައި މިއިސްލާާޙް ތަކަކީ، މިނިވަން ދިމިޤުރާތީ ހަމަތަކާއި ޚިލާފު އަދި، މިނިވަން ކޮމިޝަންތަކުގެ ގޮތުގައި ކަނޑައަޅާފައިވާ ކޮމިޝަންތަކުގެ މިނިވަންކަމާއި މުސްތަޤިއްލުކަން ގެއްލޭ އިސްލާޙްތަކެއް ކަމުގައިވާތީ އެކަމަށް އިދިކޮޅު ސިޔާސީ ފަރާތްތަކުން ވަނީ ފާޑު ކިޔާފައެވެ.