ޤާނޫނު އަަސާސީއަށް މިއަދު ގެނައި ބަދަލުތައް ތަސްދީޤު ކުރެއްވުމަށް ފަހުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިރޭ އިނގިރޭސި ވިލާތަށް ފުރާވަޑައިގެންފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި، ނުރަސްމީ ދަތުރުފުޅެއްގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން މެޑަމް ސާޖިދާ މުޙައްމަދު، މިރޭ ވަނީ އިނގިރޭސިވިލާތަށް ފުރާވަޑައިގެންފައެވެ. އަދި މި ދަތުރުފުޅުގައި، ރައީސުލްޖުމްހޫރިއްޔާ ކުރައްވާ އިދާރީ މަސައްކަތްޕުޅުތަކުގެ ޚަރަދާއި، ޢާއިލާއާއި އަމިއްލަފުޅު ކަންކަންވެސް ހިމެނޭގޮތުން، މުޅި ދަތުރުފުޅުގެ ހުރިހާ ޚަރަދެއްވެސް ކުރައްވާނީ ރައީސުލްޖުމްހޫރިއްޔާ އަމިއްލަފުޅަށް ކަމުގައި އެ އޮފީހުން ހާމަކުރައްވާފައިވެއެވެ.

ރައީސުލްޖުމްހޫރިއްޔާގެ މިދަތުރުފުޅަކީ، ނުރަސްމީ ދަތުރުފުޅަކަށްވާތީ، ދަތުރުފުޅާއި ގުޅޭ އިތުރު މައުލޫމާތެއް ރައީސުލްޖުމްހޫރިއްޔާގެ އޮފީހުން ހާމައެއް ނުކުރައްވައެވެ. އެކަމަކު އެނގިފައިވާ ގޮތުގައި ރައީސްގެ ދެކަނބަލުން އިނގިރޭސި ވިލާތަކަށް ވަޑައިންނަވަނީ އެގައުމުގައި ހުރި ދަރިކަނބަލުންގެ ގާތަށެވެ.

ރައީސުލްޖުމްހޫރިއްޔާ މިރޭ އިނގިރޭސި ވިލާތަށް ވަޑައިގެންނެވި އިރު، މިއަދު ރައްޔިތުންގެ މަޖިލީހަށް ވަނީ ވަރަށް ކުއްލި ގޮތަށް ޤާނޫނު އަސާސީއަށް އިސްލާޙްތައް ހުށައަޅައި ފާސްކޮށްފައެވެ. އޭގެ ތެރެއިން ޤާނޫނު އަސާސީއަށް ގެނައި އެންމެ ބޮޑު ބަދަލަކީ، ރައްޔިތުންގެ މަޖިލީހުގެ މެމްބަރުން ޕާޓީ ބަދަލުކޮށްފިނަމަ ނުވަތަ ޕާޓީން ވަކިކޮށްފި ނަމަ މެމްބަރުކަމުގެ ގޮނޑިގެއްލޭ ގޮތަށް ޤާނޫނަށް ގެނައި އިސްލާޙެވެ. މިއިސްލާޙް ޤާނޫނު އަސާސީގައި ހިމަނައި 12 ގަޑިއިރު ތެރޭގައި ޤާނޫނު އަސާސީ ބަދަލުކޮށްފައި ވަނީ، އެމަނިކުފާނު ފުރާވަޑައިގެންނެވުމުގެ ކުރިން އެކަން ނިންމެވުމުގެ ގޮތުން ކަމުގައިކަން އެނގިފައިވެއެވެ. 

އެމްއެމްއޭއަށް ޑޮލަރު މާރުކުރުމަށް ރާއްޖޭގެ ބޮޑެތި ބައެއް ވިޔަފާރިވެރިން ދެކޮޅުހަދާފައިވާ މިދަނޑިވަޅުގައި، މަޖިލީހުގެ މެމްބަރުންނަށް ރިޝްވަތުދީގެން ސަރުކާރާއި ދެކޮޅު ހަރަކާތްތަކެއް ހިނގައިފާނެ ކަމުގެ ބިރުވެރިކަން ވަނީ އިތުރުވެފައެވެ. އަދި 19 ވަނަ ރައްޔިތުންގެ މަޖިލީހުން ފާސްކުރި އެންޓިޑިފެކްޝަން ޤާނޫނު އުވާލުމަށްވެސް އަމިއްލަ ފަރާތަކުން އޮތީ ހުށައަޅާފައެވެ.