ބ. އޭދަފުށީގައި 1،000 ހައުސިންގް ޔުނިޓް ޢިމާރާތްކުރުމުގެ މަސައްކަތް، ޗައިނާގެ ސިނޯހައިޑްރޯ ހަވާލުކުރުމުގެ އެއްބަސްވުމުގައި ސޮއިކޮށްފިއެވެ.

މި އެއްބަސްވުމުގައި، ސޮއިކުރުމުގެ ރަސްމިއްޔާތު ބާއްވާފައި ވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައެވެ. ދިވެހި ސަރުކާރުގެ ފަރާތުން މި އެއްބަސްވުމުގައި ސޮއިކުރެއްވީ ޢިމާރާތްކުރުމާއި ބިނާރާބެހޭ ވަޒީރު ޑރ އަބްދުﷲ މުއްޠަލިބެވެ. މީގެ އިތުރުން މިމަޝްރޫޢާއި ގުޅޭ ފަހުމުނާމާގައި، މި އަހަރުގެ މޭ މަހުގެ 8 ވަނަ ދުވަހު ސޮއެކޮށް މި މަޝްރޫޢާއި ގުޅޭ ގިނަ މަސައްކަތްތަކެއް ވަނީ ކުރިޔަށް ގެން ގޮސްފައެވެ.

ބ. އޭދަފުށީގައި 1،000 ހައުސިންގް ޔުނިޓް ޢިމާރާތްކުރުމުގެ މި މަޝްރޫޢަކީ، މިހާތަނަށް އަތޮޅުތެރޭގައި ހިންގުމަށް މިސަރުކާރުން އިއުލާނުކުރި އެންމެ ބޮޑު ހައުސިންގ މަޝްރޫއެވެ. މި މަޝްރޫޢުގެ ދަށުން 15 ފަންގިފިލާގެ 12 ޓަވަރު ޢިމާރާތްކޮށް، 3 ކޮޓަރީގެ 336 ފުލެޓު އަދި 2 ކޮޓަރީގެ 672 ފުލެޓު ތަރައްޤީކުރެވޭނެ ކަމުގައި، ޢިމާރާތްކުރުމާއި ބިނާރާބެހޭ ވަޒީރު ޑރ އަބްދުﷲ މުއްޠަލިބު ވަނީ ވިދާޅުވެފައެވެ.

މިނިސްޓަރ ވިދާޅުވީ، މި ހައުސިންޔުނިޓުތައް ވެގެންދާނީ، އޭދަފުއްޓާއި އެ ސަރަޙައްދުގެ ރިސޯޓުތަކުގައި މަސައްކަތްކުރާ އާބާދީތަކަށް ބޯހިޔާވަހިކަން ލިބިގެންދާނެ ފުރުޞަތަކަށް ކަމަށެވެ.

ބ އަތޮޅަކީ ރާއްޖޭގައި އެންމެ ގިނަ ރިސޯޓުތައް ހިންގާ އެއް އަތޮޅެވެ.