Advertisement
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު --
ރައީސް ޔާމީންގެ ދައުރުގައި އިމާރާތްކުރި ދަރުމަވަންތަ ހޮސްޕިޓަލް ހުޅުވައިފި
ރައީސް ޔާމީނުގެ ސަރުކާރުގައި އިމާރާތްކޮށް މީގެ ފަސްއަހަރު ކުރިން ފެށިގެން ހުޅުވައި ޚިދުމަތްދެމުން އަންނަ ދަރުމަވަންތަ ހޮސްޕިޓަލް ރޭ ރަސްމީކޮށް ހުޅުވައިފިއެވެ.
އެކަމަށްޓަކައި ޚާއްޞަކޮށްގެން ރޭ ބޭއްވި ރަސްމިއްޔާތުގައި އެ ހޮސްޕިޓަލް ހުޅުއްވައި ދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
ދަރުމަވަންތަ ހޮސްޕިޓަލް އިމާރާތްކުރެއްވީ ރައީސް ޔާމީނުގެ ސަރުކާރުގައި ނަމަވެސް އެ އިމާރާތް ނިމި ބޭނުން ކުރަންފެށުނީ ރައީސް ޞާލިޙްގެ ވެރިކަމުގައެވެ. މިގޮތުން އެ ހޮސްޕިޓަލްގެ ޚިދުމަތް ރަސްމީކޮށް ފަށާފައި ވަނީ 2019 ވަނަ އަހަރުގެ އޭޕްރީލް މަހުގެ ތެރޭގައެވެ. އެހެން ނަމަވެސް ވޭތުވެ ދިޔަ ފަސްއަހަރުގެ ތެރޭގައިވެސް އެހޮސްޕިޓަލްގެ ހުރިހާ ބައެއް ފުރިހަމަކޮށް ބޭނުންކުރަން ފަށާފައެއް ނުވެއެވެ.
ރައީސުލްޖުމްހޫރިއްޔާގެ އޮފީހުން ހާމަކުރައްވާފައިވާ ގޮތުގައި ރޭ ހޮސްޕިޓަލް ހުޅުވާފައި ވަނީ ޓާޝަރީ ފެންވަރުގައި ޚިދުމަތްތައް ދެވޭ ހޮސްޕިޓަލެއްގެ ގޮތުގައެވެ.
ރޭ ގެ ރަސްމިއްޔާތުގައި ވަނީ، މާލޭ ސިޓީ ގްރޫޕް އޮފް ހޮސްޕިޓަލްސްގެ ލޯގޯވެސް ރައީސުލްޖުމްހޫރިއްޔާ އިފްތިތާޙްކޮށް ދެއްވާފައެވެ. މީގެ އިތުރުން، ދަރުމަވަންތަ ހޮސްޕިޓަލުގައި އަލަށް ތަޢާރަފް ކުރެވުނު ޚިދުމަތްތަކާބެހޭ ވީޑިއޯ ރިޕޯޓު ބައްލަވާލެއްވުމަށްފަހު ރައީސުލްޖުމްހޫރިއްޔާ ވަނީ ދަރުމަވަންތަ ހޮސްޕިޓަލުގައި އަލަށް ތަޢާރަފް ކުރެވުނު އެ ހޮސްޕިޓަލުގެ ކުޑަކުދިންނަށް ޚާއްސަ އީ.އާރާއި، ހައިބްރިޑް ކެތުލެބް އަދި ނޭޝަނަލް ފަރޓިލިޓީ ސެންޓަރ ބައްލަވާލައްވައި، އެތަންތަނުން ދޭ ޚިދުމަތްތަކާބެހޭ މަޢުލޫމާތު އޮޅުންފިލުއްވާފައި ކަމުގައި ރައީސުލްޖުމްހޫރިއްޔާގެ އޮފީހުން ވަނީ ހާމަކުރައްވާފައެވެ.
