Advertisement
މިނިސްޓަރ އޮފް އެޑިޔުކޭޝަން ޑރ އައިޝަތު ޢަލީ
ރައީސް ޞާލިޙް ވަނީ މުދައްރިސުންނަކީ އަސްލުގައިވެސް ގައުމީ ބިނާވެރީންކަން އަމަލީގޮތުން ދައްކުވައިދެއްވާފައި: އެޑިޔުކޭޝަން މިނިސްޓަރ
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ މުދައްރިސުންނަކީ އަސްލުގައިވެސް ގައުމީ ބިނާވެރީންކަން އަމަލީގޮތުން ދައްކުވައިދެއްވާފައިކަމުގައި މިނިސްޓަރ އޮފް އެޑިޔުކޭޝަން ޑރ.އައިޝަތު ޢަލީ ވިދާޅުވެއްޖެއެވެ.
އެކަމަނާ މިހެން ވިދާޅުވީ، މިފެށުނު ދިރާސީ އަހަރުގެ މުނާޞަބަތުގައި މިއަދު ފޮނުއްވި ޚިޠާބުގައެވެ.
އެޑިޔުކޭޝަން މިނިސްޓަރުގެ ޚިޠާބުގައި ވިދާޅުވީ، ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވަނީ މުދައްރިސުންނަކީ އަސްލުގައިވެސް ގައުމީ ބިނާވެރީންކަން އަމަލީގޮތުން ދައްކުވައިދެއްވާފައިކަމަށާއި ނަންވެ، ކަންވެސް ވާ ބައެއްގެ ގޮތުގައި މުޖުތަމަޢަށް ދައްކުވައިދެއްވާފައި ކަމަށެވެ، އެހެންކަމުން އެކަމަނާގެ އެދުމަކީ، ކޮންމެ ބޭފުޅަކީވެސް މުދައްރިސުންނަށް ހައްގު އިހުތިރާމު އަދާކުރައްވާ، ގަދަރު ދެއްވާ، ކަމޭ ހިއްތަވާ ބޭފުޅަކަށް ވުންކަމަށާއި، ހަމަ އެގޮތަށް، އެދުރުންނަކީ މުޖުތަމައު ބަލައިގަންނަ، އިހުތިރާމުކުރާ، ގަދަރުވެރި ބައެއްގެ ގޮތުގައި ވުން ކަމަށެވެ.
އެޑިޔުކޭޝަން މިނިސްޓަރ ވިދާޅުވީ، ރާއްޖޭގެ ތަޢުލީމު ކުރިއަރުވައި ފުޅާކުރެއްވުމަށް މިސަރުކާރުން ގިނަ މަސައްކަތްތަކެއް ކުރައްވާފައިވާ ކަމަށެވެ. އަދި ފާއިތުވެ ދިޔަ 30 އަހަރުގެ ތެރޭގައި، ފެނިގެން ގޮސްފައި ވަނީ، އެދުރުންގެ މުހިއްމު ކަމާއި މެދު ނޭނގި ނަމަވެސް އިޙްމާލު ވެވުނުތަން ކަމަށާއި އޭގެ ނަތީޖާއަކީ، މުދައްރިސުންގެ މަޤާމާއި ހައިބަތު، މުޖުތަމަޢުގައި ނަގަހައްޓަން އިތުރު މަސައްކަތްތަކެއް ކުރަން ޖެހުންކަން އެކަމަނާ ފާހަގަކުރެއްވިއެވެ.
މިނިސްޓަރ ވިދާޅުވީ، މުދައްރިސުންނަށް މުސާރަ ބޮޑުކޮށްދެއްވުމާއި ހަމައިން ނިންމާލުމަށް ސަރުކާރުން ޤަސްދު ނުކުރައްވާ ކަމަށެވެ. އަދި ޤައުމީ މަންހަޖުގެ ތަޞައްވަރު ޙާޞިލް ކުރެވޭނީ އަދި އޭގެ އަރައިހުރި ސިފަތައް ދަރިވަރުންގެ ކިބައިގައި އަށަގެންނުވޭނީ، އެ މަންހަޖު ރަނގަޅަށް ސްކޫލުތަކުގައި ތަންފީޒް ކުރެވޭނީ، މުދައްރިސުންނަށް އެކަށީގެންވާ ފަހި، އުފާވެރި މަސައްކަތު މާހައުލެއް ޤާއިމްކޮށްދެވިގެން ކަމުގައިވެސް މިނިސްޓަރ ވިދާޅުވިއެވެ. އަދި އެމަގަށް ސަރުކާރުން މަސައްކަތްތައް ކުރަމުންދާކަންވެސް އެޑިޔުކޭޝަން މިނިސްޓަރުގެ ވާހަކަފުޅުގައި ވަނީ ފާހަގަކުރައްވާފައެވެ.
އެޑިޔުކޭޝަން މިނިސްޓަރުގެ ޚިޠާބުގައި ވަނީ މިފެށުނު ދިރާސީ އައު އަހަރުގެ ހެޔޮއެދުމާއި ތަޙްނިޔާ ދަރިވަރުންނަށާއި މުދަރިއްސުންނަށާއި ބެލެނިވެރިންނަށް އަދި ތަޢުލީމީ ދާއިރާގެ އެންމެހައި ފަރާތްތަކަށް ފޮނުއްވާފައެވެ.
