މީޑިއާ ކޮމިޝަނުގެ ބިލުގައި ހުރި އިސްލާހުތަކާ ގުޅިގެން ކަންބޮޑުވުން ފާޅުކޮށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް މަޖިލީަށް ހުށައެޅި މައްސަލަ މަޖިލީހަށް ބަލައި ނުގަނެ ބޭރުކޮށްލައިފިއެވެ.

ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ މިއަދުގެ ޖަލްސާ ފައްޓަވަމުން ވަނީ، ގަލޮޅު ދެކުނު ދާއިރާގެ އެމްޑީޕީ މެންބަރު މީކާއިލް އަހުމަދު ނަސީމް ހުށައަޅުއްވާފައިވާ ކުއްލި މައްސަލައެއް ލިބިފައިވާ ކަމަށާއި އެހެން ނަމަވެސް އެ ހުށައެޅުއްވުމުގައި ފުރިހަމަވާންޖެހޭ ޝަރުޠުތައް ފުރިހަމަ ނުވާތީ ބަލައިގަނެވެން ނެތްކަމުގައި ވިދާޅުވެފައެވެ. މިގޮތުން، އެ މައްސަލައިގައި ދިވެހިރާއްޖޭގެ ރައްޔިތުންގެ މަޖިލީހުގެ ގަވާއިދުގެ 197 ވަނަ މާއްދާގެ އ. އަދި މ. ގައި ބަޔާންކޮށްފައިވާ ޝަރުޠުތައް ފުރިހަމަ ނުވާކަމުގައި މަޖިލީހުގެ ރައީސް ވަނީ ވިދާޅުވެފައެވެ.

މަޖިލީހުގައި މިއަދު ކުރިޔަށްދަނީ ބަޖެޓު ބަހުސްކަމުގައި ވާއިރު، މަޖިލީހަށް މިހާރު ހުށައަޅާފައި އޮތް، މީޑިއާ ކޮމިޝަންގެ ބިލާއި ގުޅިގެން މީޑިއާތަކުންނާއި ނޫސްވެރިން އަދި ސިޔާސީ ޕާޓީތަކުންވެސް ވަނީ ކަންބޮޑުވުން ފާޅުކޮށްފައެވެ.

މީކާއީލް މަޖިލީހަށް ހުށައެޅި މައްސަލައިގައި ގޮވާލާފައި ވަނީ، ގާނޫނުއަސާސީން ކަށަވަރު ކޮށްދޭ ހައްގަކަށް ހުރަސް އެޅޭގޮތަށް މަޖިލީހުން ބިލުތައް ފާސްކުރުމަށް ކުރަމުންދާ މަސައްކަތް ވަގުތުން ހުއްޓައިލުމަށެވެ.