މުހިއްމު ތިންކަމެއްގައި ރައްޔިތުންގެ އާއްމު ޚިޔާލު ހޯދުމުގެ ވޯޓަކަށް ދިޔުމަށް ނިންމަވާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ، ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

މިގޮތުން އާއްމު ޚިޔާލު ހޯދުމުގެ ވޯޓު ނެންގެވުމަށް ނިންމަވާފައި ވަނީ، ރިޔާސީ އިންތިޚާބުގެ އެންމެ ފުރަތަމަ ބުރުގައި އެންމެ ގިނަ ވޯޓު ލިބޭ ފަރާތަކަށް ވެރިކަމަށޤ އާދެވޭ ގޮތަށް ބަދަލުކުރައްވައި، ރިޔާސީ އިންތިޚާބުގެ ދެވަނަ ބުރު ނުބާއްވާގޮތަށް ހަމަޖެއްސެވުމަށާއި، ރިޔާސީ ދައުރު ފެށޭ ދުވަސް ކަމުގައިވާ ނޮވެމްބަރު 11 ގައި އަލުން އައު ރައީސް ހުވާކުރައްވާ ގޮތަށް ހަމަޖެއްސުމަށާއި، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއްކޮށްލައިގެން ބޭއްވުމަށެވެ.

އައު ރައީސް ހުވާކުރައްވާ ދުވަސް ކަމުގައި، ނޮވެމްބަރު މަހުގެ 17 ހަމަޖެހިގެން ދިޔައީ، 2013 ވަނަ އަހަރުގެ ރިޔާސީ އިންތިޚާބު ބޭއްވުނީ، 2013 ވަނަ އަހަރުގެ ނޮވެމްބަރު މަހުގެ 18 ވަަނަ ދުވަހުގައި ކަމަށް ވާތީއެވެ. އެގޮތަށް ދިމާވީ، 2013 ވަނަ އަހަރުގެ ރިޔާސީ އިންތިޚާބުގެ ފުރަތަމަ ބުރު، ދިވެހިރާއްޖޭގެ ސުޕްރީމްކޯޓުން ބާޠިލްކޮށް އަލުން ރިޔާސީ އިންތިޚާބު ބޭއްވުމަށް އަމުރުކުރުމާއި ގުޅިގެންނެވެ.

ރައީސް ޔާމީނާއި ރައީސް ޞާލިޙާއި ރައީސް ޑރ. މުޙައްމަދު މުޢިއްޒުވެސް ވެރިކަމުގެ ހުވާ ކުރައްވާފައި ވަނީ ނޮވެމްބަރު މަހުގެ 17 ވަނަ ދުވަހުގައެވެ. ރައީސް ޔާމީނާއި ރައީސް ޞާލިހްގެ ވެރިކަމުގައިވެސް ނޮވެމްބަރު 11ގައި އައު ދައުރު ފަށާގޮތަށް ވާހަކަ ދެކެވުނެވެ. އެހެން ނަމަވެސް އެކަމުގައި އުފެދުނު ޤާނޫނީ ސުވާލުތަކާއި ގުޅިގެން މިއަދާއި ހަަމައަށްވެސް އެބަދަލު އޮތީ ނުގެނެވިއެވެ.