ހިނގަމުންދާ ރިޔާސީ މި ދައުރުގައި ގެދޮރުވެރިކަމުގެ ރަންޒަމާނެއް ގެނެސްދެއްވާނޭ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ރޭ ބޭއްވި ޖުމްހޫރީ ދުވަހުގެ ރަސްމީ ޖަލްސާގައި ދެއްކެވި ވާހަކަފުޅުގައެވެ. 

ރައީސުލްޖުމްހޫރިއްޔާގެ ވާހަކަފުޅުގައި ވިދާޅުވީ، މިސަރުކާރަކީ އިންތިޚާބު ގާތްވީމާ ރައްޔިތުންގެ ބޯހިޔާވަހިކަމުގެ މަތިން ހަނދާންވާނޭ ސަރުކާރެއް ނޫންކަމަށެވެ. މިސަރުކާރުން އެންމެ އިސްކަންދެނީ، ރައްޔިތުންނަށް ބޯހިޔާވަހިކަން ހޯއްދަވައި ދެއްވުމަށްކަން ފާހަގަކުރައްވައި ރައީސުލްޖުމްހޫރިއްޔާ ވިދާޅުވީ، މިސަރުކާރުން އެކުލަވާލި ފުރަތަމަ ބަޖެޓުގައިވެސް ބޯހިޔާވަހިކަމުގެ މަޝްރޫޢުތަކަށް އެކަނިވެސް 1.5 ބިލިއަން ރުފިޔާ ކަނޑައަޅުއްވާފައިވާ ކަމަށެވެ. މިއީ ރާއްޖޭގެ ތާރީޚުގައިވެސް، ބޯހިޔާވަހިކަމަށް މިހާ ބޮޑު ޢަދަދެއް ޚާއްޞަކުރެވުނު ފުރަތަމަ ފަހަރުކަމުގައި އެމަނިކުފާނު ވިދާޅުވިއެވެ. އަދި އަންނަ އަހަރުންފެށިގެން ގެދޮރުވެރިކަމުގެ ލޯނުތަކަށް ޚާއްޞަކޮށް، އެއްބިލިޔަން ރުފިޔާ ބަޖެޓް ކުރައްވާނޭ ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، މި އަހަރުގެ ބަޖެޓުގެ ތާށިކަމާއި އެކުގައިވެސް، މި ސަރުކާރުން ތަރައްޤީގެ 38 މަޝްރޫޢު ނިންމާފައިވާކަމަށާއި، އިތުރު 26 މަޝްރޫޢު ކުރިއަށްދާކަމަށެވެ.