އާބަން ސެންޓަރުތަކުގެ ގޮތުގައި މިސަރުކާރުން 7 ރަށެއް ކަނޑައަޅައި އިއުލާނުކޮށްފިއެވެ.

މިއަދު ހައުސިންގ މިނިސްޓްރީން އާއްމުކުރި ނޫސްބަޔާނުގައި ވިދާޅުވީ، އެ ހަތް ރަށަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ރިޔާސީ ވަޢުދުުފުޅާއި އެއްގޮތްވާ ގޮތުގެ މަތިން އާބަން ސެންޓަރުތަކުގެ ގޮތުގައި ތަރައްޤީކުރުމަށް ކަނޑައަޅާފައިވާ ރަށްތަކެއް ކަމަށެވެ. އެރަށްތަކުގެ ތެރޭގައި ހިމެނެނީ:

1- ރ. އުނގޫފާރު

2- ބ. އޭދަފުށި

3- ޅ. ނައިފަރު

4- އދ. މަހިބަދޫ

5- ފ. ނިލަންދޫ

6- ދ. ކުޑަހުވަދޫ

7- ލ. ފޮނަދޫ

އާބަން ސެންޓަރުގެ ގޮތުގައި މިރަށްތަށް ކަނޑައަޅައި މިއިއުލާނުކުރީ، ހިޔާވެހި ފައިނޭންސިންގ ސްކީމަށް ހުޅުވާލި އިރު އާބަން ސެންޓަރުތަކުގެ ގޮތުގައި ކަނޑައަޅާ ރަށްތަކުގައި ގޯތި ގެދޮރު އިމާރާތް ކުރުމަށް، 3 މިލިއަން ރުފިޔާ އާއި ހަމައަށް ލޯނުދޭން ކަނޑައެޅުމަށް ފަހުގައެވެ. އާބަން ސެންޓަރު ނޫން ރަށްރަށަށް ދޫކުރުމަށް ހަމަޖައްސާފައި ވަނީ 1 މިލިއަން ރުފިޔާ އާއި ހަމައަށެވެ.

ހިޔާވެހި ފައިނޭންސިންގ ޕްރޮގްރާމަށް “ހިޔާވެހި ޕޯޓަލް” މެދުވެރިކޮށް ހުށަހެޅުމުގެ ފުރުސަތު މިހާރު ވާނީ އާންމުކޮށް ހުޅުވާލާފައެވެ.