ހުޅުމާލެ ފޭސް 2 ގެ ހިޔާޓަވަރެއްގައި ގުރޫޕަކުން މީހަކު ރަހީނުކޮށްގެން އުޅެނިކޮށް ފުލުހުންނަށް އެމީހާ ސަލާމަތް ކުރެވުނީ، އެގުރޫޕުން އެމީހާގެ އިނގިލި ބުރިކޮށްލަން އުޅެނިކޮށްކަމުގައި ފުލުހުންގެ އިދާރާއިން ވިދާޅުވެއްޖެއެވެ.

ފުލުހުންނަށް އެމީހާ ސަލާމަތް ކުރެވުނު އިރު އޭނާގެ ބޯކޮށާލާފާއިވާ ކަމުގައިވެސް ފުލުހުން ވަނީ ވިދާޅުވެފައެވެ.

ރޭ އިރާކޮޅު މީހަކު ރަހީނު ކުރި ކަމުގެ މައުލޫމާތު ލިބުމާއި ގުޅިގެން އެމީހާ ސަލާމަތް ކުރުމަށްޓަކައި ފުލުހުން ހިންގި އޮޕަރޭޝަނުގައި 10 މިނިޓްގެ ތެރޭގައި އެމީހާ ހުރިތަން ލޮކޭޓްކޮށް އެތަނަށް ފުލުހުން ވަތް ކަމުގައިވެސް ފުލުހުންގެ އިދާރާއިން ވިދާޅުވިއެވެ.

ގުރޫޕަކުން މީހަކު ރަހީނުކޮށްގެން އިނގިލި ބުރިކޮށްލަން އުޅުނީ، ހިޔާގެ 9 ވަނަ ޓަވަރުގެ 20 ވަނަ ފަންގިފިލާގެ 11 ވަނަ އެޕާޓްމަންޓް ތެރޭގައި ކަމަށް މައުލޫމާތު ލިބިފައިވެއެވެ.

މިހާދިސާގައި ގުރޫޕަކުން ރަހީނު ކުރި މީހާއަކީ ދިވެހި ފިރިހެނެކެވެ. އޭނާ ރަހީނުކުރުމުގެ މައްސަލައިގައި 12 މީހަކު ރޭ ފުލުހުން ވަނީ ހައްޔަރުކޮށްފައެވެ.

އެގުރޫޕުން އެމީހާ ރަހީނު ކުރި ސަބަބެއް މިހާތަނަށް ފުލުހުން ހާމަކޮށްފައެއް ނުވެއެވެ.