ޤާނޫނު ނަންބަރު 2021/32 (މަދަނީ އިޖުރާއާތުގެ ޤާނޫނު) އަށް އިޞްލާޙު ގެނައުމުގެ ބިލް މިއަދު ބަންޑާރަނައިބުގެ އޮފީހަށް ފޮނުވާފައިވާ ކަމުގައި ޖުޑީޝަލް ސަރވިސް ކޮމިޝަނުން ހާމަކުރައްވައިފިއެވެ.

މިބިލް ޑްރާފްޓްކޮށްފައި ވަނީ، ޖުޑީޝަލް ސަރވިސް ކޮމިޝަނުން އިސްނަގައިގެންނެވެ. ބަންޑާރަނައިބު މެދުވެރިކޮށް މި ޤާނޫނު އިޞްލާޙުކުރުމުގެ ބިލް ރައްޔިތުންގެ މަޖިލީހުގެ އިދާރާއަށް ފޮނުވުމަށް ނިންމާފައި ވަނީ، 2024 ނޮވެންބަރު 04 ވަނަ ދުވަހު ބޭއްވުނު ކޮމިޝަންގެ 57 ވަނަ ޖަލްސާއިންކަމުގައިވެސް ޖޭއެސްސީ އިން ވިދާޅުވެފައި ވެއެވެ.

ޤާނޫނު ނަންބަރު 2021/32 (މަދަނީ އިޖުރާއަތުގެ ޤާނޫނު) 16 ޑިސެންބަރު 2021 ގައި ތަސްދީޤުކޮށް، ދިވެހި ސަރުކާރުގެ ގެޒެޓްގައި ޝާއިޢުކުރެވި އޭގެ 6 މަސްފަހުން ޤާނޫނަށް ޢަމަލުކުރަން ފެށުމާއެކު ރާއްޖޭގެ ކޯޓުތަކުގައި މަދަނީ މައްސަލަތައް ތޮއްޖެހި، މައްސަލަތައް ލަސްވެ އަދި މައްސަލަތަކުގެ ޙުކުމްތައް ތަންފީޛުނުވެ މުޅި ނިޒާމަށް މިއިން ދުވަހަކު ކުރިމަތި ނުވާވަރުގެ ދަތިތައް ވަނީ ކުރިމަތިވެފައެވެ. އަދި ބޭންކުތަކާއި ވިޔަފާރި އިންސްޓިޓިއުޝަންތައް އަދި ޢާއްމު ރައްޔިތުންގެ ވިޔަފާރިތައް ހުއްޓި މަދަނީ ޢަދުލުގެ ނިޒާމަށް ކުރިމަތިވެފައިވާ މައްސަލަތަކަށް ޙައްލެއް ހޯދެން އޮތީ މިހިނދުން މިހިނދަށް ޤާނޫނަށް އިޞްލާޙުތަކެއް ގެނެވިގެންކަމަށް ފެންނަ ކަމަށްވެސް ޖޭއެސްސީން ވަނީ ހާމަކުރައްވާފައެވެ.

އެހެން ކަމުން، ޖުޑީޝަލް ސަރވިސް ކޮމިޝަނުގެ އިސްނެގުމުގެމަތިން، ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީ އާއި، އިންޓަނޭޝަނަލަށް ބެސްޓް ޕްރެކްޓިސްއާ އެއްގޮތަށް، ޤާނޫނު ނަންބަރު 2021/32 (މަދަނީ އިޖުރާއާތުގެ ޤާނޫނު) އަށް ގެންނަން ފެންނަ އިޞްލާޙުތައް މިހާރު ވަނީ ބަންޑާރަ ނައިބުގެ އޮފީހަށް ފޮނުވިފައި ކަމުގައި ޖުޑީޝަލް ސަރވިސް ކޮމިޝަނުން ވަނީ ވިދާޅުވެފައެވެ.