ދިރާގު މޯލްޑިވްސް ރޯޑް ރޭސް 2024 ގައި ދުވުމުގެ ތެރޭގައި ޞިއްޙީ މައްސަލައެއް ދިމާވި, މއ. ރިއޯ ގްރޭންޑް، އުމުރުން 45 އަހަރުގެ، އަލީ އުމަރުމަނިކު (އޮރެގާނޯ އައްޔަ) މިރޭ ނިޔާވެއްޖެއެވެ.

އޭނާ ނިޔާވީ، ހާޓް އެޓޭކެއް ޖެހި ޓްރީ ޓޮޕް ހޮސްޕިޓަލްގައި ފަރުވާދެމުން އަންނަނިކޮށް މިރޭގައެވެ. އޭނާގެ މައްޗަށް ކަށު ނަމާދުކުރުމާއި ޖަނާޒާ އޮންނާނީ މިރޭގެ ފަތިސް ނަމާދަށްފަހު، ހުުޅުމާލެ ސަހަރާގައެވެ.

އަލީ އުމަރުމަނިކު (އޮރެގާނޯ އައްޔަ) ނިޔާވުމާއި ގުޅިގެން ދިރާގުންވެސް ވަނީ އޭނާގެ އާއިލާއަށް ތަޢުޒިޔާ ފޮނުވާފައެވެ.

މިދިޔަ އޮކްޓޯބަރު 25 ވަނަ ދުވަހު ހުޅުމާލޭގައި ބޭއްވި، ދިރާގު މޯލްޑިވްސް ރޯޑް ރޭސް 2024 ގައި، 5 ކިލޯމީޓަރުގެ ދުވުން ނިންމުމަށް ކަނޑައަޅާފައިވާ ސަރަހައްދާ ކައިރިވެފައި ވަނިކޮށް އޭނާ ވެއްޓުނީ ހާޓްއެޓޭކެއް ޖެހިގެންނެވެ. އެހެން ނަމަވެސް އޭނާއަށް ފަރުވާދޭން ފެށުމަށް 10 މިނިޓަށްވުރެ ގިނަ ވަގުތު ހޭދަވިކަމަށާއި، އެކަށީގެންވާ ޞިއްޙީ ފަރުވާ ނުދެވުނު ކަމަށާއި، އަދި އޭނާ މަރުވާން ދިމާވީ އިހުމާލުން ކަމުގައި ބުނެ ބައެއް ފަރާތްތަކުން ވަނީ ސޯޝަލް މީޑިއާގައި ވާހަކަ ދައްކާފައެވެ.