މިހާރުގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ކަންކަން ކުރައްވަމުން ގެންދަވާ ގޮތުގެ ސަބަބުން، ރާއްޖޭގެ މާލީ ޙާލަތު އިތުރަށް ގޯސްވެފައިވާ ކަމުގައި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ، ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ދެއްކެވި ވާހަކަފުޅުގައެވެ. މިޕްރޮގްރާމްގައި ރައީސް ޔާމީން ވަނީ އެމަނިކުފާނުގެ ވެރިކަމުގައި ހިނގައިދިޔަ ކަންތައްތަކާއި، އަދި ރައީސް ޑރ. މުޙައްމަދު މުޢިއްޒު ވެރިކަމަށް ގެނައުމުގެ ކަންކަން ހިނގައި ދިޔަގޮތުގެ މައްޗަށް ވާހަކަފުޅުދައްކަވާފައެވެ.

ރައީސް ޔާމީން ވިދާޅުވީ، ރައީސް ޑރ. މުޙައްމަދު މުޢިއްޒު ރާއްޖޭގެ ވެރިކަމަށް ގެނައުމަށް ތާޢީދުކުރެއްވުނީތީވެސް އެކަމާއި މެދު މިހާރު ހިތާމަފުޅު ކުރައްވާ ކަމަށެވެ. އަދި ރައީސް ޑރ. މުޙައްމަދު މުޢިއްޒު ދައްކަވާ ވާހަކަފުޅުތައް ދިމާ ނުވާކަމަށާއި ވެވަޑައިގެންނެވި ވަޢުދުތައްވެސް ނުފުއްދަވާތީ، ރައީސް ޑރ މުއިއްޒުގެ މަޤުބޫލުކަން ގެއްލެމުންދާކަމުގައިވެސް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ، އެމަނިކުފާނު ޖަލު ބަންދުން ދޫކުރައްވައި، މާލެ ގެންނެވީ، މިހާރުގެ ރައީސް ޑރ. މުޙައްމަދު މުޢިއްޒު އެދިވަޑައިގެން ނޫނަކަމަށާއި، އެނިންމެވުމަކީ، ކުރީގެ ރައީސް އިބްރާހީމް މުޙައްމަދު ޞާލިޙް ނިންމެވި ނިންމެވުމަށް ކަމަށެވެ. އަދި އެމަނިކުފާނު މާލެއަށް ބަދަލުކުރި ދުވަހުންފެށިގެންވެސް މިސަރުކާރުގެ ވެރިންނާއި ގުޅުމެއް ނެތްކަމުގައި ރައީސް ޔާމީން ވިދާޅުވިއެވެ.

ރައީސް ޔާމީނުގެ ވާހަކަފުޅުގައި ވަނީ، ސަރުކާރުގެ އިޤުތިޞާދީ ސިޔާސީ އެޖެންޑާތަކުގެ ގޯސްކަންކަން ފާހަގަކުރައްވާފައެވެ. އަދި މިސަރުކާރުން އަމަލުކުރަމުން އަންނަ ގޮތުގައި ދައުލަތުގެ ބަޖެޓު ދަރަނި އިތުރަށް ބޮޑުވެ، އިޤުތިޞާދީ ގޮންޖެހުންތަކާއި ކުރިމަތިވަމުންނެވެ.