Advertisement
މައުރޫފް ޒާކިރު - ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު.
ރައްޔިތުންނަށް ގެއްލުންވާގޮތަށް ކުރާކަންކަން މަޖިލިސް ތެރެއިން ހުއްޓުވޭކަށް ނެތް: މައުރޫފް
މިސަރުކާރު ދަތުރުކުރަމުން އަންނަތަން ފެންނަނީ ޚުދުމުޚުތާރު ވެރިކަމަކާއި ދިމާއަށް ކަމަށާއި، މަޖިލީހުގެ ތެެރެއިން ސަރުކާރު ހުއްޓުވުމަށް އެމްޑީޕީއަށް ކުރެވޭނެ ކަމެއް ނެތް ކަމުގައި، ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު މައުރޫފް ޒާކިރު ވިދާޅުވެއްޖެއެވެ.
އޭނާ މިހެން ވިދާޅުވީ، ބުދަ ދުވަހު އެމްޑީޕީން މަޖިލީހުގެ އިދާރާގައި ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ. އެމްޑީޕީގެ މަޖިލިސް މެމްބަރުންގެ ގޮތުގައި މިވަގުތި ތިއްބެވީ 12 މެމްބަރުން ކަމުގައި ވާއިރު، މަޖިލީހުގެ ސުޕަރމެޖޯރިޓީ އޮތީ ޕީއެންސީއަށެވެ. އެކަން ފާހަގަކުރައްވައި މައުރޫފް ވިދާޅުވީ މަޖިލީހުގެ ތެރެއިން އެމްޑީޕީއަށް ކުރެވޭނެ މާބޮޑު ކަމެއް ނެތް ކަމަށެވެ.
މައުރޫފް ވިދާޅުވީ މިސަރުކާރުން ޤާނޫނުތަކަށް ގެންނަމުންދާ އިސްލާޙްތަކަކީ ކަންބޮޑުވާން ޖެހޭ އިސްލާޙްތަކެއް ކަމަށެވެ. މިގޮތުން، ޤާނޫނުން ކޮމިޝަންތަކަށް ދީފައިވާ ބާރުތައް ރައީސުލްޖުމްހޫރިއްޔާ ނަންގަވަމުން ގެންދަވާކަމުގައި މައުރޫފް ވިދާޅުވިއެވެ.
މިގޮތުން މައުރޫފް ވަނީ، ރައީސުލްޖުމްހޫރިއްޔާ މަސައްކަތްޕުޅު ކުރައްވަމުން ގެންދަވަނީ ދައުލަތުގެ ހިންގުމުގެ ހުރިހާ ބާރުތަކެއް މުށުތެރެއަށް ލެއްވުމަށް ކަމުގައިވެސް ވިދާޅުވެފައެވެ.
