ދިވެހިރާއްޖެއިން ޖަޕާނަށް ކުރިން ކަނޑައަޅުއްވާފައި ހުންނެވި ސަފީރު އަޙްމަދު ޚަލީލަށް އޯޑާ އޮފް ދަ ރައިޒިން ސަންގެ އިއްޒަތް ޖަޕާނު ސަރުކާރުން މިއަދު އަރުވައިފިއެވެ.

މިއީ އެކި ރޮނގުތަކުން ޖަޕާނަށް ޚިދުމަތްކޮށްދޭ ފަރާތްތަކަށް އަރުވާ އިއްޒަތެކެވެ. މިއިއްޒަތަކީ، "އޯޑާ އޮފް ދަ ރައިޒިން ސަން، ގޯލްޑް އެންޑް ސިލްވާ ސްޓާ"އެވެ. މިއީ ޖަޕާނު ސަރުކާރުން މިޢިއްޒަތް ދިވެހިބޭފުޅަކަށް އެރުވި ފުރަތަމަ ފަހަރުވެސް މެއެވެ.

މި އިއްޒަތް އެރުވުމުގެ ރަސްމިއްޔާތު މިއަދު ބާއްވާފައި ވަނީ، ޖަޕާނުގެ އިމްޕީރިއަލް ޕެލެސްގައެވެ. އޯޑާ އޮފް ދަ ރައިޒިން ސަންގެ އިއްޒަތުގެ ރަންތަރި އާއި ރިހިތަރި ހަވާލުކޮށްދެއްވައި، ޚަލީލަށް މިއިއްޒަތް އެރުއްވީ، ޖަޕާނުގެ އެމްޕެރަރ ނަރުހީޓޯއެވެ.

ޚަލީލަށް މިއިއްޒަތް އަރުވާފައި ވަނީ، ދިވެހިރާއްޖެ އާއި ޖަޕާނާ ދެމެދު އޮންނަ ގުޅުން ބަދަހިކޮށް ވަރުގަދަ ކުރުމަށް އޭނާ ކުރެއްވި މަސައްކަތުގެ އަގުވަޒަން ކުރުމުގެ ގޮތުންނެވެ. ޚަލީލު ވަނީ ޚާރިޖީ ދާއިރާގައި 42 އަހަރަށް ވުރެ ގިނަ ދުވަހު ޚިދުމަތް ކުރައްވާފައެވެ. 

ޚަލީލަށް ޖަޕާނު ސަރުކާރުގެ ފަރާތުން މި ޢިއްޒަތް އެރުވުމާއި ގުޅިގެން ކުރީގެ ރައީސް އިބްރާހީމް މުޙައްމަދު ޞާލިޙާއި، އެމްޑިޕީ ސަރުކާރުގެ ފޮރިން މިނިސްޓަރ ޢަބްދުﷲ ޝާހިދާއި، މިސަރުކާރުގެ ފޮރިން މިނިސްޓަރ ޑރ. ޢަބްދުﷲ ޚަލީލުވެސް ވަނީ އެމަނިކުފާނަށް މަރުޚަބާ ވިދާޅުވެފައެވެ.