އިލެކްޝަންސް ކޮމިޝަންގެ މެމްބަރުކަމަށް ޢައްޔަނު ކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނަންފުޅު ފޮނުއްވި، ހުޅުމާލެ ހިޔާ، 11-23-05 ޢަބްދުލް ޙަސީބު ޢިސްމާއީލަށް ރައްޔިތުންގެ މަޖިލީހުން ރުހުންދީފިއެވެ.

މަޖިލީހުގައި އޭނާއަށް ރުހުންދިނުމަށް ފެނޭތޯ ބެލުމަށް އެހި ވޯޓުގައި ބައިވެރިވެވަޑައިގެންނެވި 67 މެމްބަރުންގެ އިއްތިފާޤުންނެވެ.

އިލެކްޝަންސް ކޮމިޝަނަށް ކުރިމަތިލުމަށް ހުޅުވާލި ފުރުޞަތުގައި އެކޮމިޝަނަށް ކުރިމަތިލީ މެމްބަރުންގެ ތެރެއިން ރައްޔިތުންގެ މަޖިލީހަށް ރައީސުލްޖުމްހޫރިއްޔާ ރުހުން ހޯދުމަށް ހުށައެޅުއްވީވެސް ހަސީބުގެ ނަންފުޅު އެކަންޏެވެ.

ޢަބްދުލްޙަސީބު މިހާރު ހުންނެވީ، އިލެކްޝަންސް ކޮމިޝަނުގެ އެސިސްޓެންޓު ޑިރެކްޓަރުގެ މަގާމުގައެވެ. މީގެ ކުރިން އޭނާ ވަނީ މިނިސްޓްރީ އޮފް އިސްލާމިކް އެފެއާޒުގައިވެސް މަސައްކަތް ކުރައްވާފައެވެ.

އިލެކްޝަންސް ކޮމިޝަންގެ މެމްބަރުކަމުގެ މަޤާމަށް ބޭފުޅަކު ޢައްޔަނު ކުރައްވަނީ، އެކޮމިޝަންގެ މެމްބަރުންގެ ތެރެއިން، ކޮމިޝަންގެ ރައީސް ކަމުގެ މަޤާމުގައި މިހާރު ހުންނެވި ފުވާދު ތައުފީޤުގެ ދައުރު ހަމަވާތީއެވެ. މިމަހުގެ 24 ވަނަ ދުވަހު އޭނާގެ ދައުރު ހަމަވާނެއެވެ. އިލެކްޝަންސް ކޮމިޝަންގެ ޤަާނޫނުގައިވާ ގޮތުގައި ކޮމިޝަންގެ މެމްބަރެއްގެ މެމްބަރު ކަމުގެ ދައުރަކީ މީލާދީ 5 އަހަރެވެ.