"ހިޔާވެހި ފައިނޭންސިންގ ޕްރޮގްރާމް" ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު އިފްތިތާޙްކޮށްދެއްވައިފިއެވެ.

ރައީސުލްޖުމްހޫރިއްޔާ މިއަދު އިފްތިތާޙްކޮށްދެއްވި މި ޕްރޮގްރާމަކީ، ގެދޮރުވެރިކަމުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ތެރެއިން، ތަޢާރަފްކުރި ސްކީމެކެވެ.

2025 ވަނަ އަހަރަށް ސަރުކާރުން ހުށަހަޅުއްވާފައިވާ ބަޖެޓުގައި މި ސްކީމަށް އެކަށައަޅާފައިވާ އެއް ބިލިޔަން ރުފިޔާ ވަނީ ހިމަނުއްވާފައެވެ. މި ސްކީމާއި ގުޅޭ ގޮތުން ވާހަކަފުޅު ދައްކަވަމުން ރައީސުލްޖުމްހޫރިއްޔާ ވިދާޅުވީ، ކޮންމެ އަހަރަކު، އެއް ބިލިޔަން ރުފިޔާ ބޭނުންކޮށްގެން ދެ ބިލިޔަން ރުފިޔާގެ ލޯނު ދޫކުރެވޭނޭކަމަށެވެ.

ސަރުކާރާއި އެކުގައި، މި މަސައްކަތުގައި ބައިވެރިވާ ބޭންކްތަކުގެ ތެރޭގައި، ހައުސިންގް ޑިވެލޮޕްމެންޓް ފައިނޭންސް ކޯޕަރޭޝަން (އެޗް.ޑީ.އެފް.ސީ)، ބޭންކް އޮފް މޯލްޑިވްސް (ބީ.އެމް.އެލް) އަދި މޯލްޑިވްސް އިސްލާމިކް ބޭންކް (އެމް.އައި.ބީ) ހިމެެނެއެވެ.