ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގެ ނަމުގައި ދިވެހި ޢަސްކަރިއްޔާއާއި ފުލުހުންގެ ޚިދުމަތަށް އޮފިސަރުން ރެކްރޫޓުކުރުމުގެ ޤައުމީ ޕްރޮގްރާމެއް ހިންގެވުމަށް ނިންމަވައި ރައީސުލްޖުމްހޫރިއްޔާ އެކަން އިޢުލާނު ކުރައްވައިފިއެވެ.

އެމަނިކުފާނު މިކަން އިޢުލާން ކުރައްވާފައި ވަނީ، މިރޭ ބޭއްވެވި ނަޞްރުގެ ދުވަހުގެ ރަސްމީ ޖަލްސާ ޝަރަފުވެރިކޮށްދެއްވައި، ޤައުމާ މުޚާޠަބުކުރައްވައި ވާހަކަފުޅުދައްކަވަމުންނެވެ.

ރައީސުލްޖުމްހޫރިއްޔާ ވިދާޅުވީ، ސާނަވީ ތަޢުލީމު ނިންމުމަށްފަހު އެކި ސަބަބުތައް މެދުވެރިވެގެން ތަޢުލީމީ ޙަޔާތް ކުރިއަށް ގެންދެވެން ނެތް، އަދި ވަޒީފާގެ ފުރުޞަތުވެސް ތަނަވަސްވެފައި ނެތް، 16 އަހަރުން މަތީގެ ދިވެހި ދަރީން، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގައި ބައިވެރިކޮށް، ދިވެހި ޢަސްކަރިއްޔާ ނުވަތަ ފުލުހުންގެ ޚިދުމަތަށް ރެކްރޫޓް ކުރެވޭނެ ކަމަށެވެ. 

ރައީސުލްޖުމްހޫރިއްޔާ ވިދާޅުވީ، ތަފާސް ހިސާބުތަކަށް ބަލާއިރު ކޮންމެ އަހަރަކުވެސް އޯލެވެލް ސަނަދު ފުރިހަމަ ކުރުމަށްފަހު އެއަށްވުރެ މަތީ ފާހަކަށް ނުކިޔެވި، ނުވަތަ ވަޒީފާއެއް ނެތިފައި ތިބުމަށް 500 އާއި 1000 އާއި ދެމެދުގެ އަދަދެއްގެ ކުދިންނަށް މަޖުބޫރުވާ ކަމަށާއި، ނަމަވެސް ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގެ ސަބަބުން އެކަން ބަދަލުވެގެންދާނެ ކަމަށެވެ. މިގޮތުން، ޢިލްމާއި ވަޒީފާގެ ފުރުޞަތުތަކުން މަހްރޫމުވުމުގެ ނަތީޖާއަކަށް ވަނީ މަސްތުގެ ވަބާގެ ތެރެއަށް ވަދެގެންދާ މީހުންގެ ޢަދަދު އިތުރުވުން ކަމަށާއި، އެކަމުގެ ނަތީޖާއަކަށް ވަނީ ސަރުކާރާއި، މުޖުތަމަޢު އަދި ޢާއިލާތަކުން އުފުލަންޖެހޭ ބުރަ ބޮޑުވުން ކަމުގައި ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމުގެ ތެރެއިން، ޢަސްކަރިއްޔާއާއި ފުލުހުންގެ ޚިދުމަތަށް، ކުރިއަށް އޮތް 4 ވަރަކަށް އަހަރު ދުވަހުގެ ތެރޭގައި 5000 ޒުވާނުން ރެކްރޭޓުކުރެވޭނެ ކަމަށެވެ. އެއީ، ޢަސްކަރީ ޚިދުމަތަށް ރެކްރޭޓު ކުރާ ހަތަރުހާހެއްހާ ސިފައިންނާއި، ފުލުހުންގެ ޚިދުމަތަށް ރެކްރޫޓުކުރާ ހާހެއްހާ އޮފިސަރުންކަމުގައި އެމަނިކުފާނު ވިދާޅުވިއެވެ. 2025 ވަނަ އަހަރަށް ކަނޑައަޅާފައިވާ ދަޢުލަތުގެ ބަޖެޓުގައި ނިއު ޕޮލިސީ އިނިޝިއޭޓިވްސް (އެންޕީއައި)ގެ ތެރެއިން 400 މިލިއަން ރުފިޔާ، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމަށް ޚާއްޞަ ކުރެވޭނެ ކަމަށްވެސް ރައީސުލްޖުމްހޫރިއްޔާ ވިދާޅުވިއެވެ. 

ރައީސުލްޖުމްހޫރިއްޔާ ވިދާޅުވީ، ދިވެހިރާއްޖޭގެ ޤައުމީ ޚިދުމަތުގެ ޕްރޮގްރާމަކީ، ޤާނޫނުން ބާރު ލިބިގެން ހިންގާނެ ޕްރޮގްރާމަކަށް ވެގެންދާނެ ކަމަށެވެ.