އިއްޔެއިން ފެށިގެން މުޅި ރާއްޖެއަށް އަދި ޚާއްސަކޮށް މާލެ ސަރަހައްދަށް އުދަ އަރަމުންދާތީ ބައެއް ކަންކަމަށް އާންމުން ސަމާލުވުމަށް ނޭޝަނަލް ޑިޒާސްޓަރ މެނޭޖްމަންޓް ސެންޓަރުން އިލްތިމާސްކޮށްފިއެވެ. މިއަދުވެސް ބައެއް ވަގުތުތަކުގައި އުދަ އަރާނެކަމަށް ވަނީ ލަފާކޮށްފައެވެ. 

އިއްޔެ މެންދުރުން ފެށިގެން މާލޭ އިރުމަތީ ފަރާތު ރާޅުގަނޑާއި ސިނަމާލެ ބްރިޖު ހިމެނޭ ސަރަހައްދަށް ބޮޑެތި ރާޅުތައް އަރައި މަގުތަކުގައި ވަނީ ފެން ބޮޑުވެފަ އެވެ. އުދައިގެ ރާޅާއެކު ވެއްޔާއި ގާ ވެސް ވަނީ ވަރަށް ބޮޑަށް އެއްގަމަށް ޖަމާވެފަ އެވެ. 

މިއަދުވެސް އުދަ އެރުމަކީ އެކަށީގެންވާ ކަމަކަށްވާއިރު މިކަންކަމަށް ސަމާލުވުމަށް އެންޑީއެމްއޭއިން ވަނީ އާންމުންނަށް އިލްތިމާސްކޮށްފައެވެ. އެއީ: 

- އުދަ އަރައިގެން ފެންބޮޑުވެދާނެ ކަމަށް ތައްޔާރުވުން

- ގެއަށް ފެން ނުވަންނާނެހެން ވެލި ބަސްތާ ޖަހާ, ރައްކާތެރިކަމުގެ ފިޔަވަޅު އެޅުން

- ގޭތެރޭގައި ފެންބޮޑުވެއްޖެނަމަ ގެއްލުންވާނެ މުދާތައް އުސްތަންތަނަށް ބަދަލުކުރުން

- ބަނދަރު ސަރަހައްދުގައި އެއްގަމު އުޅަނދު ޕާކު ނުކުރުން

- އޮޑިދޯނިފަހަރުގެ ވާ ކަނޑައިގެން ނުދާނެހެން އެއްސުން

- ދިޔަވަރު ބޮޑު ގަޑީގައި ސިނަމާލެ ބްރިޖުން ދަތުރުކުރާއިރު ސަމާލުވުން

- ސިއްހީ މައްސަލަތަކުން ސަލާމަތްވުމަށް, އުދައާއެކު ރަށުތެރެއަށް ފެތުރޭ ކުނި އަވަހަށް ސާފުކުރުން

ބްރިޖާއި, ބޮޑުތަކުރުފާނު މަގުން ދަތުރުކުރުމަށް ދަތިވާ ވަރަށް ވެއްޔާއި ގާ އަރާފައި އޮތުމުގެ ސަބަބުން އެމްޓީސީސީން އިއްޔެގެ ވަކި ވަގުތެއްގައި ވަނީ, ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހިން ކާނިވާ ބަސް ސްޓޮޕަށް ދަތުރުކުރާ ބަސްތައް ވަގުތީގޮތުން މެދުކަނޑާލާފަ އެވެ.