އިއްޔެގެ ނިޔަލަށް ސަރުކާރުގެ ސިޔާސީ މަޤާމުތަކުން، 248 މީހުން ވަކިކޮށްފައިވާ ކަމުގައި ރައީސުލްޖުމްހޫރިއްޔާގެ އޮފީހުގެ އިސް ތަރުޖަމާނު ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ، ސިޔާސީ މުވައްޒަފުން ވަޒީފާއިން ވަކިކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވި ޢަމާޒަށް ވާޞިލް ނުވެވޭކަމަށް ބައެއް މީޑިއާތަކުން މިއަދު ރިޕޯޓްކުރަންފެށުމާއި އެކުގައެވެ.

ހީނާ ވިދާޅުވީ، ސަރުކާރުގެ އިކޮނޮމިކް ރިފޯމް އެޖެންޑާގެ ދަށުން ޚަރަދު ކުޑަ ކުރުމަށް އަޅަމުންދާ ފިޔަވަޅު ތަކުގެ ތެރެއިން، މިހާތަނަށް 31 އޮކްޓޯބަރު 2024 ގެ ނިޔަލަށް 248 ސިޔާސީ މުވައްޒަފުންވަނީ މަދުކުރެވިފައިވާ ކަމަށެވެ. ހަމަ އެއާއެކު ސިޔާސީ މުވައްޒަފުންގެ މަސައްކަތުގެ ފެންވަރު ބަލާ، ކުރުންތެރިކަން އިތުރު ކުރުމަށް ސިޔާސީ މުވައްޒަފުންގެ ޕަރފޯމަންސް ބަލާނެ ނިޒާމެއް ޤާއިމް ކުރުމަށް ކެބިނެޓުން މިހާރު ވަނީ ނިންމާފައި ކަމަށާއި މިނިޒާމަށް ވަރަށް އަވަހަށް ޢަމަލު ކުރަން ފަށާނެކަމުގައިވެސް ހީނާ ވިދާޅުވިއެވެ.

މި ހުސްވި އޮކްޓޫބަރު މަހުގެ 15 ވަނަ ދުވަހު ރައީސުލްޖުމްހޫރިއްޔާ ކުރެއްވި ޓްވީޓެއްގައި ވިދާޅުވެފައި ވަނީ، އެދުވަހުން ފެށިގެން 15 ދުވަހުގެ ތެރޭގައި، 228 ސިޔާސީ މުވައްޒަފުން މަޤާމުން ވަކިކުރައްވާނެ ކަމަށެވެ. ސިޔާސީ މަޤާމުތައް މަދު ކުރެއްވުމަށް ނިންމަވާފައި ވަނީ، އިޤުތިޞާދީ ރިފޯމް އެޖެންޑާގެ ދަށުން ކަމުގައިވެސް އެމަނިކުފާނު ވިދާޅުވިއެވެ. މިގޮތުން ވަޒީފާއިން ވަކިކުރެއްވުމަށް ނިންމެވި، 228 މީހުންގެ ތެރޭގައި ހިމެނެނީ، 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑައިރެކްޓަރުންނާއި، 69 ޕޮލިޓިކަލް ޑައިރެކްޓަރުން ކަމުގައިވެސް އެދުވަހު ރައީސުލްޖުމްހޫރިއްޔާ ވިދާޅުވެފައިއެވެ. އަދި އެ ބަދަލުގެ ސަބަބުން ސިޔާސީ ފަރާތްތަކަށް މުސާރަދިނުމަށް ހޭދަވާ ފައިސާއިން މަހަކު 5.714 މިލިއަން ރުފިޔާ ސަލާމަތް ކުރެވޭނެ ކަމުގައި ރައީސުލްޖުމްހޫރިއްޔާ ވަނީ ފާހަގަކުރައްވާއިވެއެވެ.

248 ސިޔާސީ މުވައްޒަފުން މަޤާމުން ވަކިކޮށްފައިވާ ކަމުގައި ހިނާ ވިދާޅުވި ނަމަވެސް އެކަމުގެ ތަފްސީލެއް ނުދެއްވައެވެ.