288 ސިޔާސީ މުވައްޒަފުން ވަޒީފާއިން ވަކިކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ކަނޑައެޅުއްވި ޢަމާޒަށް ވާޞިލް ނުވެވި މުއްދަތު ފަހަނަ އަޅައިފިއެވެ.

މި ހުސްވި އޮކްޓޫބަރު މަހުގެ 15 ވަނަ ދުވަހު ރައީސުލްޖުމްހޫރިއްޔާ ކުރެއްވި ޓްވީޓެއްގައި ވިދާޅުވެފައި ވަނީ، އެދުވަހުން ފެށިގެން 15 ދުވަހުގެ ތެރޭގައި، 228 ސިޔާސީ މުވައްޒަފުން މަޤާމުން ވަކިކުރައްވާނެ ކަމަށެވެ. އެހެން ނަމަވެސް އެމުއްދަތު އިއްޔެ ފަހަނަ އެޅިއިރު، 228 ސިޔާސީ މުވައްޒަފުން ވަޒީފާއިން ވަކިކުރިކަމެއް ސަރުކާރުން ހާމަކުރައްވާފައެއް ނުވެއެވެ.

އަދި އެކަމާއި ގުޅިގެން ބައެއް ފަރާތްތަކުންވެސް ވަނީ ސުވާލު އުފައްދާފައެވެ. މިގޮތުން ކުރީގެ ޕްރޮސެކިއުޓަރ ޖެނެރަލް އަޙްމަދު މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވީ، ރައީސުލްޖުމްހޫރިއްޔާ ވިދާޅުވި 15 ދުވަސް ހަމަވެފައިވާ ކަމަށާއި، 228 ސިޔާސީ މުވައްޒަފުން ވަކިކުރި ކަމުގެ ޚަބަރެއް އަދި ނުއްސަވާ ކަމަށެވެ.

ސަރުކާރުގެ ސިޔާސީ މަޤާމުތަކުގެ ތިއްބެވި 228 މީހަކު ވަޒީފާއިން ވަކިކުރެއްވުމަށް ނިންމަވައިފިކަމުގައި ރައީސުލްޖުމްހޫރިއްޔާ ހާމަކުރެއްވީ މީގެ 16 ދުވަސް ކުރިންނެވެ.  ސިޔާސީ މަޤާމުތައް މަދު ކުރެއްވުމަށް ނިންމަވާފައި ވަނީ، އިޤުތިޞާދީ ރިފޯމް އެޖެންޑާގެ ދަށުން ކަމުގައިވެސް އެމަނިކުފާނު ވިދާޅުވިއެވެ. މިގޮތުން ވަޒީފާއިން ވަކިކުރެއްވުމަށް ނިންމެވި، 228 މީހުންގެ ތެރޭގައި ހިމެނެނީ، 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުންނާއި، 109 ސީނިއަރ ޕޮލިޓިކަލް ޑައިރެކްޓަރުންނާއި، 69 ޕޮލިޓިކަލް ޑައިރެކްޓަރުން ކަމުގައިވެސް އެދުވަހު ރައީސުލްޖުމްހޫރިއްޔާ ވިދާޅުވެފައިއެވެ. އަދި އެ ބަދަލުގެ ސަބަބުން ސިޔާސީ ފަރާތްތަކަށް މުސާރަދިނުމަށް ހޭދަވާ ފައިސާއިން މަހަކު 5.714 މިލިއަން ރުފިޔާ ސަލާމަތް ކުރެވޭނެ ކަމުގައި ރައީސުލްޖުމްހޫރިއްޔާ ވަނީ ފާހަގަކުރައްވާއިވެއެވެ.