ސިނގިރޭޓާއި ވޭޕްގެ ޑިއުޓީ ބޮޑުކުރުމަށް ޤާނޫނަށް ގެނައި އިސްލާޙް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަސްދީޤު ކުރައްވައިފިއެވެ.

މި ބިލުން، ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް ގެނެވުނު ބަދަލުތަކުގެ ތެރޭގައި ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކާއި، އިލެކްޓްރޯނިކް ސިގިރެޓް އަދި މިފަދަ ވޭޕްކުރުމަށް ބޭނުންކުރާ އާލާތްތަކާއި، ހީޓަޑް ޓޮބޭކޯ ޕްރޮޑަކްޓްތަކާއި، ޓޮބޭކޯ ހީޓިންގ ޕްރޮޑަކްޓްތަކާއި، އެ އެއްޗެހީގެ ބައިބައި ޤާނޫނަށް އިތުރުކޮށް އެއިން ޑިއުޓީ ނެގުމާއި މިހާރު ނަގަމުން އަންނަ ޑިއުޓީތައް ބޮޑު ކުރުމެވެ.

 ޤާނޫނަށް ގެނައި އިސްލާޙްތައް:

ދުންފަތާއި، ދުންފަތުން ތައްޔާރުކޮށްފައި ހުންނަ ބާވަތްތަކާއި، ދުންފަތުގެ ބަދަލުގައި ބޭނުންކުރާ ބާވަތްތަކުގެ ޑިއުޓީ 200 އިންސައްތައަށް ބޮޑުކުރުން.

ސިނގިރެޓުން ނަގާ ޑިއުޓީ، 50 އިންސައްތައަށް ބޮޑުކުރުމާއި އެކު ސިނގިރޭޓަކުން 8 ރުފިޔާގެ ޑިއުޓީއެއް ނެގުން.

ބިޑިން ނަގާ ޑިއުޓީ، 50 އިންސައްތައަށް ބޮޑުކުރުމާއި އެކު ބިޑިއަކުން 8 ރުފިޔާގެ ޑިއުޓީއެއް ނެގުން.

އިލެކްޓްރޯނިކް ސިގިރެޓަށް ނުވަތަ ދުންފަތުގެ އިސްތިޢުމާލުކުރުމަށް ބޭނުންކުރާ އެނޫންވެސް އާލާތްތަކަށް އަޅާ ފްލޭވަރ އާއި ކެމިކަލްއިން ނަގާ ޑިއުޓީއަކީ 50 އިންސައްތަ ކަމުގައި ކަނޑައަޅައި، ކޮންމެ މިލިލީޓަރަކަށް 8 ރުފިޔާގެ ޑިއުޓީއެއް ނެގުން. 

ހީޓަޑް ޓޮބޭކޯ ޕްރޮޑަކްޓްސް ނުވަތަ ރޯކުރުމަކާ ނުލާ ހޫނުކޮށްގެން ބޭނުންކުރެވޭ ގޮތަށް އުފައްދާފައި ހުންނަ ދުންފަތުގެ އުފެއްދުންތަކުން، ނަގާ ޑިއުޓީއަކީ 50 އިންސައްތަ ކަމުގައި ކަނޑައަޅައި، ކޮންމެ ސްޓިކްއަކުން 8 ރުފިޔާގެ ޑިއުޓީއެއް ނެގުން.

އިލެކްޓްރޯނިކު ސިނގިރޭޓާއި މިފަދަ ވޭޕްކުރުމަށް ބޭނުންކުރާ އާލާތްތަކާއި، ޓޮބޭކޯ ހީޓިންގ ޕްރޮޑަކްޓްތަކުން ނަގާ ޑިއުޓީގެ މިންވަރަކީ 200 އިންސައްތަކަމުގައި ކަނޑައެޅުން.

ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް ގެނެވޭ އިޞްލާޙުތަކާ ގުޅިގެން އެކުލަވާލަންޖެހޭ ނުވަތަ އިޞްލާޙުކުރަންޖެހޭ ގަވާއިދުތަކާއި އުސޫލުތައް، މި ޤާނޫނަށް ޢަމަލުކުރަން ފަށާ ތާރީޚުން ފެށިގެން 30 ދުވަހުގެ ތެރޭގައި ހަދައި، ދިވެހިސަރުކާރުގެ ގެޒެޓުގައި ޝާއިޢުކުރަންޖެހޭނެ ކަމުގައިވެސް އިސްލާޙް ގެނެވުނު ބިލުގައި ބަޔާންކޮށްފައި ވެއެވެ.

ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނަށް 19 ވަނަ އިޞްލާޙު ގެނައުމުގެ ބިލު ރައީސުލްޖުމްހޫރިއްޔާ ތަޞްދީޤުކުރެއްވުމާއެކު، އެ ޤާނޫނު މިއަދު ވަނީ ދިވެހިސަރުކާރުގެ ގެޒެޓުގައި ޝާއިޢުކުރައްވާފައެވެ. މި ޤާނޫނަށް ޢަމަލުކުރަން ފަށާނީ މިއަދުންފެށިގެންނެވެ.