ދައުލަތުގެ އިދާރާތަކުގެ ތެރޭގައި އަށަގެންފައިވާ ކޮރަޕްޝަނާއި ނުހައްގު މުއްސަދިކަން ހޯދުމުގެ މައްސަލަތައް ތަހްގީގުކޮށް، ދަޢުވާކުރުމަށް ހުރި ގޮންޖެހުންތައް ނައްތާލުމަށް ދިވެހިރާއްޖޭގެ ޤާނޫނުލްޢުޤޫބާތަށް އިސްލާހް ގެނައުމަށް ނިންމަވާފައިވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، ސޯޝަލް މީޑިއާގެ މަންސަތަކުގައި ލިޔުއްވި ޕޯސްޓެއްގައެވެ.

ރައީސުލްޖުމްހޫރިއްޔާ ވިދާޅުވީ، ޤާނޫނުލްޢުޤޫބާތަށް ގެންނަ އިސްލާޙްތައް އަންނަ ހަފްތާގައި ރައްޔިތުންގެ މަޖިލީހަށް ހުށައަޅުއްވާނެ ކަމަށެވެ. 

އެގޮތުން، ޤާނޫނުލްޢުޤޫބާތުގެ 515 ވަނަ މާއްދާއަށް ގެނެވޭ އިސްލާހުގެ ސަބަބުން ރައީސުލްޖުމްހޫރިއްޔާއާއި ވަޒީރުންނާއި ރައްޔިތުންގެ މަޖިލީހުގެ މެންބަރުންނާއި ފަނޑިޔާރުން ހިމެނޭގޮތުން، ދައުލަތުގެ މުވައްޒަފުންނާއި ދައުލަތުގެ މުވައްޒަފެއްގެ މަޤާމު އަދާކޮށްފައިވާ ފަރާތްތަކުން ހޯދަމުންދާ ނުވަތަ ހޯދާފައިވާ ނުޙައްޤު މުއްސަނދިކަމުގެ މައްސަލަތައް ބެލުމަށް ފަސޭހަވެގެންދާނެކަމުގައި ރައީސުލްޖުމްހޫރިއްޔާ ވިދާޅުވިއެވެ.

ޤާނޫނުލް އުޤޫބާތަށް އިިސްލާޙް ގެނައުމަށް ނިންމާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރެއްވި އިރު އެމަަނިކުފާނުގެ މައްޗަށް ތުހުމަތުކޮށް ހުށައަޅާފައިވާ މައްސަލަތަކެއް އެންޓި ކޮރަޕްޝަން ކޮމިޝަން އޭސީސީގައި އެބަ އޮތެވެ. އޭގެ އިތުރުން، ކުރީގެ ރައީސް ޔާމީނުގެ ވެރިކަމުގައި ހިނގައިދިޔަ އެމްއެމްޕީއާރްސީގެ ޚިޔާނާތާއި، އަދި މިދިޔަ ދައުރުގައި ހެލްތު މިނިސްޓްރީގެ ތެރޭގައި ހިނގައިދިޔަކަމަށް ބުނާ ވެންޓިލޭޓަރުތައް ގެނައުމުގެ ޚިޔާނާތުގެ މައްސަލައަކީ އާއްމުންގެ ތެރޭގައި ވަރަށް ބޮޑަށް ކަންބޮޑުވުން އުފެދިފައިވާ މައްސަލަތަކެވެ.