ދެއަހަރު ދުވަސްވާންދެން ސިޔާސީ މަޤާމުތަކުގައި ތިބި ފަރާތްތަކާއި ދައުލަތުގެ ކުންފުނިތަކުގެ މުވައްޒަފުންގެ މުސާރައިން %10 އުނިކުރުމަށް ނިންމެވުމަށްފަހުގައި، އަންނަ އަހަރު ސިވިލް ސަރވިސް މުވައްޒަފުންނާއި ޝަރުޢީދާއިރާގެ މުވައްޒަފުންގެ މުސާރަ ބޮޑު ކުރުމަށް ސަރުކާރުން ނިންމަވައިފިއެވެ.

އަންނަ އަހަރަށް ލަފާކޮށް ސަރުކާރުން މިއަދު ރައްޔިތުންގެ މަޖިލީހަށް ހުށައެޅި ބަޖެޓުގައި ވަނީ، ޕޭ ހާމަނައިޒްކޮށް މުސާރަތައް އެއްހަމަ ކުރުމަށް ކުރީ ސަރުކާރުން ފަށާފައިވާ މަސައްކަތްތައް  ކުރިޔަށް ގެންދިޔުމަށް ނިންމާފައެވެ. ފިނޭންސް މިނިސްޓަރު މޫސާ ޒަމީރު މިއަދު ވިދާޅުވީ ސިވިލް ސާވަންޓުންނާއި ޝަރުއީ ދާއިރާގެ މުވައްޒަފުންގެ މުސާރަތައް ހާމަނައިޒް ކުރަން 500 މިލިއަން ރުފިޔާ އަންނަ އަހަރުގެ ބަޖެޓުގައި ހިމަނުއްވާފައިވާ ކަމަށެވެ. އަދި އެހެން ހުރިހާ މުވައްޒަފުންނަށް 2026 ވަނަ އަހަރުންފެށިގެން މުސާރަ ބޮޑު ކުރުމަށް ރާއްވަވާފައިވާ ކަމުގައި ފިނޭންސް މިނިސްޓަރ މޫސާ ޒަމީރު ވިދާޅުވިއެވެ.

އަންނަ އަހަރަށް ލަފާކޮށް ހުށައެޅި ދައުލަތުގެ ބަޖެޓުގައި ދައުލަތުގެ މުވައްޒަފުންގެ މުސާރަ އާއި އިނާޔަތްތަކަށް 13.9 ބިލިއަން ރުފިޔާ ވަނީ ހިމަނާފައެވެ. އެއީ މިހިނގާ އަހަރަށްވުރެ ގާތް ގަނޑަކަށް 2 ބިލިއަން ރުފިޔާ އިތުރު އަދަދެކެވެ.

ދިވެހި ސިވިލްސަރވިސް މުވައްޒަފުންގެ ގޮތުގައި ދައުލަތުން މުސާރަދޭ ތިރީސް ހާހަށްވުރެ ގިނަ މުވައްޒަފުން އެބަތިއްބެވެ.