ކުރިއަށް އޮތް 20 އަހަރު ދުވަހަށް އެކުލަވާލާ ދިވެހިރާއްޖޭގެ ޤައުމީ ތަރައްްޤީގެ މާސްޓަރ ޕްލޭން އިފްތިތާޙް ކުރުމަށް ބާއްވާ ރަސްމިއްޔާތަށް ސަރުކާރުން ބޮޑު ހޭދައެއް ނުކުރާ ކަމުގައި ރައީސުލްޖުމްހޫރިއްޔާގެ އޮފީހުގެ އިސްތަރުޖަމާނު ހީނާ ވަލީދު ވިދާޅުވެއްޖެއެވެ.

ހީނާ މިހެން ވިދާޅުވީ، އިޤުތިޞާދީ ގޮތުން ދަތި މިދަނޑިވަޅުގައި ސަރުކާރުންކުރާ އިސްރާފު ޚަރަދުތައް ބޮޑުކަން ހާމަކޮށް، ރާއްޖޭގެ އޮންލައިން ނޫހަކުން ފެތުރި ޚަބަރަކަށް ރައްދު ދެއްވައި ސޯޝަލްމީޑިއާގައި ލިޔުއްވި ޕޯސްޓްގައެވެ. ހީނާ ވިދާޅުވީ، އެއީ ގާތްގަނޑަކަށް ދެލައްކަ ރުފިޔާއަށްވުރެވެސް ކުޑަ ބަޖެޓަކުން މުޅި ރާއްޖެ ޝާމިލުވާގޮތަށް ހިންގަން ރާވަމުން އަންނަ ކަމެއް ކަމަށެވެ. 

އަަންނަ ހަފްތާގައި ބޭއްވުމަށް ހަމަޖައްސާފައި ވަނީ، ދިވެހިރާއްޖޭގެ ޤައުމީ ތަރައްްޤީގެ މާސްޓަރ ޕްލޭން އެކުލަވާލުމުގެ މަސައްކަތް އިފްތިތާޙް ކުރުމަށް ބާއްވާ ރަސްމިއްޔާތެއް ކަމުގައި ހައުސިން މިނިސްޓްރީން ވަނީ ބުނެފައެވެ.

ދިވެހިރާއްޖޭގެ ޤައުމީ ތަރައްޤީގެ މާސްޓަރ ޕްލޭނެއް އެއް އަހަރު ދުވަހުގެ ތެރޭގައި އެކުލަވާލުމަށް ނިންމައި އެކަމާއި ގުޅޭ މަސައްކަތްތައް ވިލަރެސް ކުރާނެ މުއައްސަސާއެއްގެ ގޮތުގައި ހަމަޖައްސަވާފައި ވަނީ، ހުސްވި ސެޕްޓެމްބަރު މަހުގެ 16 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައެވެ.