ހައްޖަށާއި ޢުމްރާައަށް މީހުން ގެންދިޔުން، އެއީ ވިޔަފާރިއަކަށްވުރެ ބޮޑަށް ދަރުމަޔާ ސަވާބަށް އެދި ކުރާ ކަމެއްކަމުގައި ހެއްދެވުމަށް ރައީސުލްޖުމްހޫރިއްޔާގެ ނައިބު ޙުސައިން މުޙައްމަދު ލަޠީފް އެދިވަޑައިގެންފިއެވެ.

އެމަނިކުފާނު މިކަމަށް އެދިވަޑައިގަތީ، މިއަދު އިސްލާމީ މަރުކަޒުގައި ފެށި، ދިވެހިރާއްޖޭގެ ފުރަތަމަ ޙައްޖު، ޢުމްރާ ކޮންފަރަންސްގައި ބައިވެރިވެވަޑައިގެން ވާހަކަފުޅު ދައްކަވަމުންނެވެ.

މިކޮންފަރެންސާއި ގުޅޭ ގޮތުން ރައީސުލްޖުމްހޫރިއްޔާގެ ނައިބު ވިދާޅުވީ، ކޮންފަރަންސްގެ ނިންމުންތަކުގެ އަލީގައި، ޙައްޖާއި ޢުމްރާގެ ޚިދުމަތުގެ ދާއިރާ ފުޅާވެ މުޅި ނިޒާމު ފުރިހަމަވެގެންދާނޭ ކަމަށް ޔަޤީންކުރައްވާކަމަށެވެ. އަދި ޙައްޖުވެރިންގެ ފައިސާއަށް ރައްކާތެރިވެ، ޙައްޖު ފަންޑު ތަރައްޤީކޮށް ދިރުވުމަށް އައު ވިސްނުންތަކެއް ވިސްނައި، ޙައްޖުގެ އަގު ތިރިކުރުމަށް ސަރުކާރުން ގެންގުޅުއްވާ ސިޔާސަތު ޙަޤީޤަތަކަށް ވެގެންދާނޭކަމަށް އުއްމީދުކުރައްވާ ކަމުގައިވެސް އެމަނިކުފާނު ވަނީ ވިދާޅުވެފައެވެ.

ހައްޖުގެ އަޅުކަމަށް ކުރަންޖެހޭ ހޭދަ ކުޑަކުރުމާއި، ހައްޖުގެ އަޅުކަން އަދާކުރުމުގެ މާލީ ތަނަވަސްކަން ނެތް 1000 މީހަކަށް މި ރިޔާސީ ދައުރުގެ ތެރޭގައި ހައްޖުގެ އަޅުކަން އަދާކުރުމަށް ފުރުޞަތު ދެއްވާނޭ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވަޢުދުވެވަޑައިގެންފައެވެ.

ރާއްޖެއިން މީހުން ހައްޖަށް ގެންދިޔުމުގައި ދިމާވަމުން އަންނަ މައްސަލަތަކުގެ ސަބަބުން، ރާއްޖެއިން މީހުން ހައްޖަށް ގެންދިޔުން، މޯލްޑިވްސް ހައްޖު ކޯޕަރޭޝަނާއި ހަވާލު ކުރެއްވީ މިދިޔަ ރިޔާސީ ދައުރުގައެވެ.