ގާތްގަނޑަކަށް ދޮޅު މަހުގެ ބޮޑު ބަންދަކަށް ފަހު ރާއްޖޭގެ ހުރިހާ ސްކޫލުތަކެއްގައި ދިރާސީ އައު އަހަރުގެ ކިޔެވުން މިއަދު ފަށައިފި އެވެ. 

އެޑިއުކޭޝަން މިނިސްޓްރީން މައުލޫމާތު ދެއްވާ ގޮތުގައި މިއަހަރުގެ ދިރާސީ އައު އަހަރުގެ ކިޔެވުން ފަށާފައިވަނީ 84,200 އެއްހާ ދަރިވަރުންނާއެކުއެވެ. އެއީ ސަރުކާރު ސްކޫލްތަކުގައި ކިޔަވާ 73,078 ދަރިވަރުންނާއި އަދި އަމިއްލަ ސްކޫލްތަކުގައި ކިޔަވާ ދަރިވަރުންނާވެސް އެކުގައެވެ. މުޅި ޖުމްލަ 216 ސްކޫލެއްގައި މިއަދު ވަނީ ކިޔެވުން ފަށާފައެވެ. މީގެތެރެއިން 156 ސްކޫލެއްގައި އެއް ދަންފަޅިއަށް ކިޔަވައިދެ އެވެ.  

ދިރާސީ އައު އަހަރުގެ ކިޔެވުން ފެށޭއިރު، މާލެ ސަރަޙައްދުގައި އިތުރު ސްކޫލްތަކެއްގައި ކިޔަވައިދޭން ވަނީ ފަށާފައެވެ. އެއީ ހުޅުމާލޭ ދެވަނަ ފިޔަވަހީގައި ދިރިއުޅޭ ކުދިންނަށް ޚާއްސަކޮށްގެން ސަރުކާރުން ތަރައްޤީކުރި ސްކޫލާއި، ދަރުމަވަންތަ ސްކޫލްގެ އައު ޢިމާރާތާއި ސީއެޗްއެސްސީގެ އައު އިމާރާތާއި ހުޅުމާލޭގެ ފުރަތަމަ ފިޔަވަހީގައި ތަރައްޤީކޮށްފައިވާ ސްކޫލްތަކުގައެވެ.

ޖާގައިގެ ދަތިކަން ކުރިން ކުރިމަތިވެފައިވާ އަރަބިއްޔާ ސްކޫލުގެ ދަރިވަރުން މި ދިރާސީ އާ އަހަރު ފަށަނީ، ކުރިން ދަރުމަވަންތަ ސްކޫލު ހިންގި އިމާރާތުގަ އެވެ. 

މިފެށުނު ދިރާސީ އަހަރުގެ ފުރަތަމަ ޓާމުގެ ބަންދު އަންނަނީ ޑިސެމްބަރު 22 އިން އަންނަ އަހަރުގެ ޖެނުއަރީ ހައެއްގެ ނިޔަލަށެވެ. އަދި އަންނަ އަހަރު ބޮޑު ބަންދު އަންނާނީ ޖޫނު 13 އިން ޖުލައި 30 އަށެވެ.