އަންނަ އަހަރު އިންޑިއާއިން ދިވެހިރާއްޖެއަށް 1.6 ބިލިއަން ރުފިޔާގެ ހިލޭ އެހީ ލިބޭނެ ކަމުގައި ފިނޭންސް މިނިސްޓަރ ލަފާކުރައްވައި ބަޖެޓުގައި ހިމަނުއްވައިފިއެވެ.

އަންނަ އަހަރަށް ލަފާކުރާ ދައުލަތުގެ ބަޖެޓު މިއަދު ވަނީ، ފިނޭންސް މިނިސްޓަރ މޫސާ ޒަމީރު ރައްޔިތުންގެ މަޖިލީހަށް ހުށައަޅުއްވައި ދެއްވާފައެވެ. 

އިންޑިއާއިން ދޭ 1.6 ބިލިއަންގެ ހިލޭ އެހީއާއެކު، އެކުވެރި ޤައުމުތަކުން ހިލޭ އެހީގެ ގޮތުގައި ދޭ ފައިސާގެ ޖުމުލައަދަދު 2.25 ބިލިއަން ރުފިޔާއަށް އަރާނެ ކަމަށްވެސް ބަޖެޓު ފޮތުގައި އަންދާޒާކޮށްފައިވެއެވެ.

ރާއްޖެއަށް އެންމެ ބޮޑު އެހީތެރިކަމަށް ފޯރުކޮށްދޭ ޤައުމަކީ އިންޑިއާ ކަމުގައި ވާއިރު، ބަޖެޓު ސަޕޯޓަށާއި، ދައުލަތުގެ ކޭޝް ފްލޯ ހަމަޖެއްސުމަށް އަބަދުވެސް އިންޑިއާއިން އަންނަނީ އެހީތެރިކަން ފޯރުކޮށްދެމުންނެވެ.

ރާއްޖެއަށް އާއްމުގޮތެއްގައި ހިލޭ އެހީތައް ދެމުން އަންނަ ޤައުމުތަކުގެ ތެރޭގައި، އިންޑިއާ، ޗައިނާ، ޖަޕާން، އެމެރިކާ އަދި ސަޢޫދީ ޢަރަބިއްޔާ އާއި ޕާކިސްތާނާއި، ޔުނައިޓެޑް އެރެބް އެމިރޭޓްސްވެސް ހިމެނެއެވެ.

އަންނަ އަހަރު އިންޑިއާއިން ރާއްޖެއަށް ދޭނެކަމަށް އަންދާޒާކޮށްފައި ހިލޭ އެހީގެ ބޮޑު ބަޔަކީ، ޢުމްރާނީ ތަރައްޤީގެ މަޝްރޫޢުތަކަށް އެޤައުމުން ދޭ ފައިސާއެވެ.

މިވެރިކަން ފެށުނު އިރު އިންޑިއާ އާއި ދިވެހިރާއްޖޭގެ ގުޅުން ގޯސްވެފައި ވީނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ޚާރިޖީ ސިޔާސަތުތަކަށް ގެނެސްފައިވާ ބަދަލާއި އެކު އެގުޅުން މިހާރު އަންނަނީ ބަދަހި ވަމުންނެވެ. އަދި ދާދިފަހުން ރައީސުލްޖުމްހޫރިއްޔާ ވަނީ އިންޑިއާގެ ރައީސާގެ ދަޢުވަަތަކަށް އެޤައުމަށް ފުރަމާނަ ދަތުރުފުޅެއްވެސް ކުރައްވާފައެވެ.