އަންނަ އަހަރަށް ލަފާކުރާ ދައުލަތުގެ ބަޖެޓު މިއަދު ރައްޔިތުންގެ މަޖިލީހަށް ހުށައަޅައިފިއެވެ.

ފިނޭންސް މިނިސްޓަރ މޫސާ ޒަމީރު މިއަދު ރައްޔިތުންގެ މަޖިލީހަށް ހުށައަޅުއްވައި ދެއްވި، ބަޖެޓުގެ  ޖުމުލަ އަދަދަކީ، 56.6 ބިލިއަން ރުފިޔާއެވެ. މިއީ މިހާތަނަށް ރާއްޖޭގައި ފާސްކުރެވޭ އެންމެ ބޮޑު ބަޖެޓަށް ވާނެއެވެ.

މިއަހަރަށް ލަފާކޮށް ރައްޔިތުންގެ މަޖިލީހުން ފާސްކޮށްފައި ވަނީ 49.8 ބިލިއަން ރުފިޔާގެ ބަޖެޓެކެވެ. އަދި މިހަފްތާގައި މަޖިލީހުން ފާސްކޮށްދިން 5 ބިލިއަން ރުފިޔާގެ ސަޕްލިމެންޓްރީ ބަޖެޓާއި އެކު މިއަހަރުގެ ބަޖެޓުވެސް 55 ބިިލިއަނަށް އަރައެވެ. އެހެން ނަމަވެސް މިއަހަރަށް ފާސްކުރި ބަޖެޓުގެވެސް ދެބައިކުޅަ އެއްބަޔަކީ ދަރަންޏެވެ.

އަންނަ އަހަރަށް ލަފާކޮށް މިސަރުކާރުންވެސް ހުށައަޅާފައި ވަނީ ދަރަނި ބަޖެޓެކެވެ. ސަރުކާރުން އަންދާޒާ ކުރަނީ އަންނަ އަހަރު، ޓެކްސްތަކާއި ފީއާއި އެހެނިހެން އާމްދަނީގެ ގޮތުގައި ދައުލަތަށް ލިބޭނެ އާމްދަނީ އަކީ، 39،8 ބިލިއަން ރުފިޔާ ކަމަށެވެ. އެއީ ހިލޭ އެހީތައްވެސް ހިމަނައިގެންނެވެ. އެއާއެކު މިއަހަރުގެ ބަޖެޓުގެ ދަރަނިވެސް އުޅޭނީ 10 ބިލިއަން ރުފިޔާގައެވެ.

މިއަހަރަށް ސަރުކާރުން ހުށައެޅި ބަޖެޓުގެ ޖުމުލަ ޚަރަދު ކަމުގައި ހިމަނާފައި ވަނީ 49 ބިލިޔަން ރުފިޔާއެވެ. އޭގެ ތެރެއިން 35.8 ބިލިޔަން ރުފިޔާއަކީ ރިކަރަންޓް ޚަރަދެވެ. ކެޕިޓަލކް ޚަރަދުގެ ގޮތުގައި 13.4 ބިލިޔަން ރުފިޔާ ހިމަނާފައި ވާއިރު، ޕީއެސްއައިޕީ މަޝްރޫޢުތަކަށް 12.4 ބިލިޔަން ރުފިޔާ ހިމަނާފައިވެއެވެ.

މިއަހަރުގެ ބަޖެޓުގެ ދަރަނިވެސް 18 ބިލިއަން ރުފިޔާއަށް އަރައެވެ.