މިނިވަން މުއައްސަސާތަކުގެ ތެރެއިން، އޭސީސީ އާއި އީސީގެ ރައީސުންނާއި ނައިބު ރައީސް ރައީސުލްޖުމްހޫރިއްޔާ ޢައްޔަނުކުރައްވާ ގޮތަށް ޤާނޫނަށް ގެންނަން އުޅޭ އިސްލާޙް ތަކާއި ލާމަރުކަޒީ ޤާނޫނަށް އިސްލާޙްތައް ގެނައުމަށް ސަރުކާރުން ކުރަމުންދާ މަސައްކަތްތަކާއި ދެކޮޅަށް އެމްޑީޕީން ތެދުވާނެ ކަމުގެ އިންޒާރު ދީފިއެވެ.

އެމްޑީޕީގެ ޗެއާ ޕަރސަން ފައްޔާޒް އިސްމާޢީލް ކުރެއްވި ޓްވީޓެއްގައި ވިދާޅުވީ، ވޭތުވެދިޔަ 20 އަހަރުތެރޭ ރައްޔިތުންގެ ބާރުވެރިކަން ގާއިމުކުރުމަށާއި، ހުދުމުހުތާރުވެރިކަމަކުން އުފެދޭ ބޭއިންސާފާއި އަނިޔާވެރިކަން ގަބޫލުނުކުރާ ފިކުރު އަށަގެންނެވުމަށް އެމްޑީޕީ އިން ކުރަމުން ގެންދިޔަ މަސައްކަތް މިސަރުކާރުން އެގެންދަނީ ރޫޅާލަމުން ކަމަށެވެ. އަދި މިހާރު ހުށަހަޅާފައި ހުރި ބިލުތަކަކީ ރައްޔިތުންގެ ބާރުވެރިކަމާއި ސަރުކާރު ޖަވާބުދާރީ ކުރުމަށް އޮތް އަސާސްތައް ކަފުން ކުރުމަށް މި ސަރުކާރުން ތަންފީޒުކުރަމުންދާ އެޖެންޑާގެ ތެރެއަށް އިތުރުވި ޖަރީމާއެއް ކަމުގައިވެސް ފައްޔާޒު ވަނީ ވިދާޅުވެފައެވެ.

ސިޔާސީ ޕާޓީއެއްގެ މެންބަރަކު ގާނޫނާ ހިލާފު ކަމެއް ކޮށްފި ނަމަ، އެ މީހަކު ޖޫރިމަނާ ކުރުމުގެ އިތުރުން، އެ މީހަކު ނިސްބަތްވާ ޕާޓީ 100،000ރ. އިން ޖޫރިމަނާ ކުރެވޭ ގޮތަށް ގާނޫނު އިސްލާހު ކުރުމަށް ސަރުކާރުގެ ފަރާތުން ވަނީ ރައްޔިތުންގެ މަޖިލީހަށް އިސްލާޙެއް ހުށައަޅާފައެވެ. އެއިސްލާޙާއި ގުޅިގެންވެސް އެމްޑީޕީން ވަނީ ކަންބޮޑުވުން ފާޅުކޮށްފައެެވެ.