އަންހެނުންގެ ޢާލަމީ ރީތީގެ މުބާރާތް، (މިސް ޔުނިވާސް)ގައި ރާއްޖޭގެ ފަރާތުން ބައިވެރިވި މަރިޔަމް ޝައިނާ ނަސީމް އެމުބާރާތުގައި ބައިވެރިވުން ކުށްވެރިކޮށް، އޭނާ މުބާރާތުން ވަކިވުމަށް ދިވެހި ސަރުކާރުން ގޮވާލައިފިއެވެ.

ސަރުކާރުން މިކަމަށް ގޮވާލައި، ޔޫތު މިނިސްޓްރީން ވަނީ މިއަދު ބަޔާނެއްވެސް ނެރެފައެވެ. އެމިނިސްޓްރީން މިބަޔާން ނެރެފައި ވަނީ، ސަރުކާރަށް ތާޢީދު ކުރި ބައެއް ދީނީ ޢިލްމުވެރިންނާއި އާއްމުންނާއި ސިޔާސީ ފަރާތްތަކުން އެކަމުގެ ފާޑުކިޔުންތައް ސަރުކާރަށް ޢަމާޒު ކުރުމުންނެވެ.

މެކްސިކޯގައި ނޮވެމްބަރު މަހު 17، ގައި ބާއްވާ 73 ވަނަ މިސް ޔުނިވާސްގައި ރާއްޖޭގެ ފަރާތުން ވާދަ ކުރާ އުމުރުން 21 އަހަރުގެ މަރިޔަމް ޝައިނާ ނަސީމްއަކީ، ރާއްޖޭގައިވެސް މޮޑެލްކުރުމުގައި ފާހަގަކޮށްލެވޭ ފަންނާނެކެވެ. އަދި އޭނާ ވަނީ، 2022 ވަނަ އަހަރު އޮތް ޓޮޕް މޮޑެލް މޯލްޑިވްސް ގެ އެއްވަނަ މަޤާމުވެސް ހޯދާފައެވެ.

އަންހެނުންގެ ޢާލަމީ ރީތީގެ މުބާރާތުގައި ޝައިނާ ބައިވެރިވުން ކުށްވެރިކޮށް، ޔޫތު މިނިސްޓްރީން ނެރުނު ބަޔާނުގައި ބުނެފައި ވަނީ، އެފަދަ ކަންކަމަކީ ދިވެހިން ގަބޫލު ކުރާ އާންމު އަހުލާގީ މިންގަނޑުތަކާއި އުސޫލުތަކާ ވެސް ހިލާފު ކަންކަމަށް ވާއިރު، ރާއްޖެ ތަމްސީލު ކުރުމުގެ ނަމުގައި ދިވެއްސަކު އެފަދަ ހަރަކާތްތަކަށް ދިޔުން، ދިވެހި ސަރުކާރުން ކުށްވެރި ކުރާކަމަށެވެ. އަދި އެކަން ހުއްޓާލުމަށް ވެސް ގޮވާލާ ކަމުގައި ޔޫތު މިނިސްޓްރީގެ ބަޔާނުގައި ބުނެފައެވެ.

މީގެ އިތުުރުން އެބަޔާނުގައި ބުނެފައި ވަނީ، ދިވެހިންގެ ދީނާއި އަގީދާ އާއި ސަގާފަތާ ނުގުޅޭ ހަރަކާތްތަކާއި މުބާރަތްތައް ބޭއްވުމާއި އަދި އެކިއެކި ފަރާތްތަކުން ބާއްވާ އެފަދަ މުބާރާތްތަކާއި ހަރަކާތްތަކުގައި ދިވެހިން ބައިވެރިވުމަކީ ދިވެހި ސަރުކާރުން ބަލައިގަންނާނެ ކަމެއް ނޫން ކަމަށެވެ.

ޝައިނާ، އެމުބާރާތުގައި ބައިވެރިވެފައިވާތީ، ސަރުކާރަށް ބައެއް ފަރާތްތަކުން ފާޑު ކިޔަމުންދާއިރު، ޔޫތު މިނިސްޓްރީގެ ބަޔާނަށްވެސް ބައެއް ފަރާތްތަކުން ވަނީ ފާޑު ކިޔާފަށެވެ. އަދި ޝައިނާ އަންހެނުންގެ ޢާލަމީ ރީތީގެ މުބާރާތުގައި ބައިވެރިވުމާއި، ރާއްޖޭގައި ފިރިހެނުންގެ މެދުގައި ބާއްވާ މިސްޓަރ މޯލްޑިވްސް ހޮވުމުގެ މުބާރާތްވެސް ބައެއް ފަރާތްތަކުން ވަނީ އަޅާ ކިޔާފައެވެ. 

ދިވެހިރާއްޖޭގައި މިހާތަނަށް އަންހެނުންގެ ރީތީގެ މުބާރާތެއް ބާއްވާފައި ވަނީ، މީގެ 61 އަހަރު ކުރިން، މިލާދީން 1953 ދިވެހިރާއްޖޭގެ ފުރަތަމަ ޖުމްހޫރިއްޔާ އިއުލާނު ކުރުމާއި ގުޅިގެން ކުރިޔަށް ގެންދިޔަ ހަރަކާތްތަކުގެ ތެރެއިންނެވެ. ދިވެހިރާއްޖޭގެ ރީތީގެ ރާނީއަކަށް ހޮވާފައިވާ ހަމައެކަނި އަންހެނަކީ، ހއ. ބާރަށު ރަމްލާ އަޙްމަދެވެ.