ރިޔާސީ އިންތިޚާބުގެ ތެރޭގައި ވަޢުދުވެވަޑައިގެންނެވި ގޮތަށް، 48 ގަޑިއިރުގެ ތެރޭގައި މަސްވެރިންނަށް ފައިސާ ދިނުމަށް މަސައްކަތް ކުރައްވަމުންގެންދަވާ ކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މަސްވެރިންނަށް ފައިސާ ނުދެވި އެކަމުގެ ކަންބޮޑުވުމާއި ފާޑު ކިޔުންތައް އަމާޒުވެފައި ވަނިކޮށް ސޯޝަލް މީޑިއާގައި ކުރެއްވި ޕޯސްޓެއްގައެވެ. 

ރައީސުލްޖުމްހޫރިއްޔާގެ ޕޯސްޓްގައި ވިދާޅުވީ،  މެނިފެސްޓޯގައިވާ ފަދައިން 48 ގަޑި އިރު ތެރޭގައި ދެމެހެއްޓެނިވި ގޮތެއްގައި ފައިސާ ދެވޭނޭ ނިޒާމު ޤާއިމު ކުރުމުގެ މަސައްކަތް ދަނީ ކުރެވެމުން ކަމަށެވެ.

މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދިނުމަކީ، ރައީސުލްޖުމްހޫރިއްޔާ ޑރ، މުހައްމަދު މުޢިއްޒުގެ ރިޔާސީ މުޙިއްމު ވަޢުދެކެވެ. އެހެން ނަމަވެސް ވެރިކަމުގެ ފުރަތަމަ އަހަރު ނިމިގެން ދާއިރު އެވަޢުދު ހާސިލްކުރެވިފައި ނުވާތީ ސިޔާސީ ފަރާތްތަކުގެ ފާޑު ކިޔުންތައް ވަނީ ސަރުކާރަށާއި ރައީސުލްޖުމްހޫރިއްޔާއަށް އަމާޒުވެފައެވެ.

މިސަރުކާރު ވެރިކަމަށް އައުމަށްފަހުގައި، އެސްޓީއޯގެ ދަށުން ހިންގަމުން އައި މިފްކޯ ވަނީ އެކުންފުނީގެ ދަށުން އަލުން ވަކި ކުންފުންޏަކަށް ހަދާފައެވެ. އެހެން ނަމަވެސް އަދިވެސް އެކުންފުންޏަކީ ޚަރަދު ދެކޮޅު ޖެއްސޭ ކުންފުންޏަކަށް ނުވާތީ އެކުންފުންޏަށް ސަރުކާރުން އަބަދުވެސް އަންނަނީ ފައިސާ ދެމުންނެވެ.