ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުގައި ރާއްޖޭގެ އެކި ރަށްރަށުގައި ޕޮލިސް ސްޓޭޝަންތައް އެޅުމަށް ކުރިޔަށް ގެންދަން ރޭވި އިންދިރާ ޕޮްރޮޖެކްޓާއި ގުޅޭ ގޮތުން، މިހާރުގެ ހޯމް މިނިސްޓަރ ޢަލީ އިޙްސާން އެކިއެކި ޕްލެޓްފޯމްތަކުގައި، އިތުރުފުޅު ހައްދަވާފައިވާ ކަމުގައި، ކުރީގެ އިކޮނޮމިކް މިނިސްޓަރ އަދި އެމްޑީޕީގެ ޗެއާ ޕަރސަން ފައްޔާޒް އިސްމާޢީލް ވިދާޅުވެއްޖެއެވެ.

މިސްޓަރ ފައްޔާޒު ވަނީ އެމައްސަލައިގައި ހޯމް މިނިސްޓަރު އިތުރުފުޅު ހައްދަވައި، ތަފާތު އެކި ޕްލެޓްފޯމްތަކުގައި ވާހަކަފުޅުތައް ދައްކަވަމުން ގެންދަވާތީ އިންދިރާ ޕްރޮޖެކްޓްގެ ކަންކަން ބައްލަވައި ދެއްވުން އެދި އޭސީސީގެ ރައީސް އާދަމް ޝާމިލަށާއި، ކޮމިޝަނަރ އޮފް ޕޮލިސް ޢަލީ ޝުޖާޢުއަށް ސިޓީ ފޮނުއްވާފައެވެ. އޭސީސީއަށާއި ފުލުހުންނަށް ފައްޔާޒް ފޮނުއްވި ސިޓީގައިވަނީ، މިނިސްޓަރ އިޙްސާން ކުރައްވަމުންގެންދަވާ ތުހުމަތުތައް ބައްލަވައި އެކަންކަމާއި ގުޅޭ ތެދު މައުލޫމާތު ހާމަކޮށްދެއްވުމަށް އެދިވަޑައިގެންފައެވެ.

ފައްޔާޒް ވިދާޅުވީ، މިނިސްޓަރު އިހުސާން ވަނީ ‘ކުރީސަރުކާރުން’ ޕޮލިސް ޔުނިޓުތަކެއް އެޅުމާގުޅޭ ޕްރޮޖެކްޓަކާއި ގުޅިގެން އެކި ޕްލެޓްފޯމްތަކުގައި ދޮގު މައުލޫމާތު ދެއްވާފައި ކަމަށެވެ.

ފައްޔާޒް ވިދާޅުވީ، އެކަމުގައި ރަސްމީކޮށް ޖަވާބުދާރީވުމުގެ މަގު ތަނަވަސް ކުރުމުގެ ގޮތުން މި މައްސަލަ ތަހުގީގު ކޮށްދިނުމަށް އެދި އޭސީސީ އަދި ފުލުހުންނަށް މިއަދު ހުށައަޅުއްވާފައިވާ ކަމަށެވެ. އަދި އެ ވާހަކަ އިހުސާން ދެން ދައްކަވަން ވާނީ ރައްޔިތުންގެ ފަރާތުން ހަވާލުކޮށްފައިވާ ޒިންމާ އަދާކުރެއްވުމަށް ފަހުގައި ކަމަށްވެސް ފައްޔާޒް ވަނީ ވިދާޅުވެފައެވެ.

އިންދިރާ ޕްރޮޖެކްޓް ހިންގަން އުޅުނު ކުންފުނިން، ފައްޔާޒްގެ އާއިލީ ކުންފުނި ބިގްގެ ހިއްޞާ ގަނެ އެކުންފުނިން މިހާރު ދަނީ، މޫނިމާގެ އިމާރާތް ކުރަމުން ކަމުގައި މީޑިއާތަކުގައި ވަނީ ޚަބަރު ފަތުރާފައެވެ. އަދި އެޕްރޮޖެކްޓާއި ގުޅޭ ގޮތުން އިޙްސާން ވަނީ، ގިނަ ތުހުމަތުތަކެއް ކުރައްވާފައެވެ.