ސަރުކާރުން ރައްޔިތުންގެ މަޖިލީހަށް ހުށައެޅި، ސަޕްލިމެންޓްރީ ބަޖެޓް، ސަރުކާރުން ހުށައެޅި ގޮތަށް, އެއްވެސް ބަދަލެއް ނުގެނެސް މަޖިލީހުން ފާސްކޮށްދީފިއެވެ.

މިއަދު ރައްޔިތުންގެ މަޖިލީހުން ފާސްކޮށްދިން ސަޕްލިމެންޓްރީ ބަޖެޓްގެ ޖުމުލަ އަދަދަކީ، 5.1 ބިލިއަން ރުފިޔާއެވެ. ސަޕްލިމެންޓްރީ ބަޖެޓެއް ސަރުކާރުން ހުށައެޅި އިރު، މިއަހަރަށް ފާސްކުރި ބަޖެޓުން ކުރި ޚަރަދު ތަފްޞީލެއް ސަރުކާރުން ހާމައެއް ނުކުރެއެވެ. އަދި ބަޖެޓް ދިރާސާކުރި ކޮމިޓީއަށްވެސް ވަނީ އެމައުލޫމާތު ސިއްރުކުރިއެވެ.

ރައްޔިތުންގެ މަޖިލީހުގައި މިއަދު ނެގި ވޯޓުގައި، ސަޕްލިމެންޓްރީ ބަޖެޓް ސަރުކާރުން ހުށައެޅި ގޮތަށް ފާސްކުރުމަށް، 75 މެމްބަރުން ވޯޓު ދެއްވި އެވެ. ސަރުކާރުން ހުށައަޅާފައި އޮތް ގޮތަށް ބަޖެޓް ފާސްކުރުމާއި ދެކޮޅަށް ވޯޓު ދެއްވީ، އެމްޑީޕީއަށް ނިސްބަތްވެވަޑައިގަންނަވާ 11 މެމްބަރުންނެވެ. މިވޯޓުގައި ޖުމުލަ 86 މެމްބަރުން ބައިވެރިވެވަޑައިގެންނެވިއެވެ.

މިއަދު ފާސްކުރި، ސަޕްލިމެންޓްރީ ބަޖެޓުގައި އެންމެ ބޮޑު އަދަދެއް ހިމަނާފައި ވަނީ ޕީއެސްއައިޕީ މަޝްރޫޢުތަކަށެވެ. ޕީއެސްއައިޕީ މަޝްރޫޢުތަކަށް 2 ބިލިއަން ރުފިޔާ ހިމަނާފައިވެއެވެ. ދެވަނައަށް އެންމެ ބޮޑު އަދަދެއް ހިމަނާފައި ސަބްސިޑީއަށެވެ. ސަބްސިޑީތަކަށް 1 ބިލިއަން ރުފިޔާ ވަނީ ހިމަނާފައެވެ. މީގެ އިތުރުން ކޮންޓިންޖެންސީ ބަޖެޓަށް 600 މިލިއަން އަދި ސަރުކާރު ޙިއްޞާވާ ކުންފުނިތަކަށް 441 މިލިއަން ދިނުމަށް ވަނީ ހިމަނާފައެވެ. އަދި އާސަންދަ އާއި އެންސްޕާގެ ދަށުން، ބޭސްފަރުވާގެ އެހީ ދިނުމަށް 262.6 މިލިއަން ރުފިޔާ ހިމަނާފައިވެއެވެ.