ފަރުމަހުގެ މަސްވެރިކަމުގެ ސިނާޢަތު ތަރައްޤީކުރުމުގެ ގޮތުން ދޫކުރާ ލޯނަށް އެދި ހުށައެޅި ފަރާތްތަކުގެ ތެރެއިން 37 ފަރާތަކަށް އެލޯނު ހަމަޖައްސައިދީފައިވާ ކަމުގައި، ފިޝަރީޒް މިނިސްޓްރީން ވިދާޅުވެއްޖެއެވެ.

އެމިނިސްޓްރީން އިއްޔެ ވަނީ، ފަރުމަސްވެރިކަމުގެ ލޯނަށް އެދި ހުށައެޅި ފަރާތްތަކާއި އެކު އިއްޔެ އިސްލާމީ މަރުކަޒުގައި، ބައްދަލުވުމެއް ބާއްވާފައެވެ. 

ފަރުމަސްވެރިކަމާއި ފަރުމަސްވެރިކަމުގެ އުފެއްދުންތައް އުފެއްދުމުގައި ހަރަކާތްތެރިވާ އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ދޫކުރުމަށް ހުޅުވާލި ލޯނަށް އެދި އެހުށައެޅުމުގެ މުއްދަތު ހަމަވިއިރު، 121 ފަރާތަކުންވަނީ ލޯނަށް އެދި ހުށައަޅާފައި ކަމުގައި ފިޝަރީޒް މިނިސްޓްރީން ވިދާޅުވިއެވެ. އަދި ލޯނަށް އެދި ހުށައެޅި ފަރާތްތަކުގެ އަދަދު ގިނަވުމާއިއެކު، 20 މިލިއަން ރުފިޔާ ދޫކުރުމަށް ކަނޑައެޅި މި ސްކީމްގެ އަދަދު 30 މިލިޔަން ރުފިޔާއަށް އިތުރުކޮށް، ޖުމުލަ 62 ފަރާތަކަށް ލޯނު ދޫކުރުމަށް ނިންމާފައިވާ ކަމުގައި އެމިނިސްޓްރީން ވަނީ ހާމަކޮށްފައެވެ.

ފަރުމަހުގެ މަސްވެރިކަން ތަރައްޤީކުރުމަށް މަސްވެރި ވުޒާރާއާއި އެސްއެމްއީ ޑެވެލޮޕްމަންޓް ފައިނޭންސް ކޯޕަރޭޝަން ގުޅިގެން ކަނޑުފަޅުނަފާ ޕްރޮގްރާމްގް ތެރެއިން ފަރުމަހުގެ ލޯނަށް ހުޅުވާލީ މިއަހަރުގެ ފެބްރުވަރީ މަހު 16 ވަނަ ދުވަހުގައެވެ.