ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރުގައި ހިންގި ބިންވެރިޔާ ސްކީމްގެ ދަށުން، ހުޅުމާލެ ފޭސް 2 އިން ދޫކޮށްފައިވާ ހުރިހާ ގޯތިތައް، އެގޯތިތަކުގެ ވެރިފަރާތްތަކާއި ހަވާލުކޮށް ނިމިއްޖެ ކަމުގައި ހައުސިން މިނިސްޓްރީން ވިދާޅުވެއްޖެއެވެ.

ހައުސިންގ މިނިސްޓްރީން އިއްޔެ ހާމަކުރި ގޮތުގައި، ރައީސުލްޖުމްހޫރިއްޔާގެ ވައުދުފުޅާއި އެއްގޮތައް އޮކްޓޯބަރ މަސް ނިމުމުގެ ކުރިން ހުޅުމާލެ ފޭސް 2 އިން ގޯތި ލިބިފައިވާ ފަރާތް ތަކުގެ ގޯތި ހަވާލުކުރުމަށް ކުރި މަސައްކަތުން ހުރިހާ ގޯތިތައް ހަވާލު ކުރުމުގެ މަސައްކަތް އިއްޔެގެ ނިޔަަލަށް ވަނީ ނިމިފައެވެ.

ބިންވެރިޔާ ސްކީމްގެ ދަށުން، ހުޅުމާލެ ފޭސް 2، އަދި ފޭސް 3ގެ އިތުރުން ގިރާވަރުފަޅާއި، ގުޅިފަޅުން ޖުމުލަ 9003 ގޯތި ދޫކޮށްފައި ވެއެވެ. އޭގެ ތެރެއިން ބިމާއި ހަވާލުވެވިފައި ވަނީ އަދި ހުޅުމާލެ ފޭސް 2އިން ގޯތި ލިބުނު މީހުންނަށް އެކަންޏެވެ. ހުޅުމާލެ ފޭސް 3 އާއި ގުޅީފަޅާއި ގިރާވަރު ފަޅުން، ގޯތި ލިބުނު މީހުންނަށް ގޯތިތައް ހަވާލު ކުރުމަށް ސަރުކާރުން އަންނަނީ އެކި މުހުލަތުތައް ދެމުންނެވެ.